اسلام آباد: وزارتِ خارجہ نے عائشہ فاروقی کی جگہ زاہد حفیظ کو دفتر خارجہ کا ترجمان مقرر کر دیا۔
اے آر وائی نیوز کو ذرائع سے موصول ہونے والی اطلاعات کے مطابق دفتر خارجہ کی موجودہ ترجمان عائشہ فاروقی ٹریننگ کے لیے روانہ ہورہی ہیں جس کی وجہ سے زاہد حفیظ کو ترجمان کا عہدہ دینے کا فیصلہ کیا۔
وزارت خارجہ نے زاہد حفیظ کی تقرری کا باضابطہ نوٹی فکیشن بھی جاری کردیا جس کے بعد انہوں نے عہدہ سنبھال لیا۔
زائد حفیظ کون ہیں؟
زاہد حفیظ چوہدری وزارتِ خارجہ میں گزشتہ 26 برس سے خدمات انجام دے رہے ہیں، انہوں نے بطور ڈائریکٹر جنرل افغانستان، ایران، ترکی اور جوائنٹ سیکریٹری نیشنل سیکیورٹی کے عہدے پر ذمہ داریاں انجام دی ہیں۔
زاہد حفیظ چودھری وزارت خارجہ میں بطور ڈائریکٹر جنرل جنوبی (ساوَتھ) ایشیا اور سارک میں تعینات ہوچکے ہیں۔
یاد رہے کہ وزارت خارجہ نے عائشہ فاروقی کو 19 دسمبر کو ترجمان دفتر خارجہ مقرر کیا تھا۔ اس سے قبل عائشہ فاروقی ہیوسٹن میں پاکستان کی قونصل جنرل کی حیثیت سے ذمہ داری انجام دے رہی تھیں۔
عائشہ فاروقی کو ڈاکٹر فیصل کی جگہ دفتر خارجہ کا ترجمان تعینات کیا گیا تھا۔ اس سے قبل وہ بطور سفارت کار فرانس، مصر، برطانیہ، ترکی اور امریکا میں خدمات انجام دے چکی تھیں۔