گورنر سندھ کامران ٹیسوری نے گزشتہ روز اسلام آباد میں سابق صدر آصف زرداری سے ملاقات کی جس کی اندرونی کہانی اے آر وائی نیوز سامنے لے آیا۔
اے آر وائی نیوز کے مطابق گزشتہ روز سابق صدر آصف زرداری سے گورنر سندھ کامران ٹیسوری نے ملاقات کی جس میں صوبے اور ملکی سیاسی مسائل پر گفتگو کی گئی۔ ملاقات میں سیاسی مفاہمت اور کراچی سمیت ایم کیو ایم معاہدے سے متعلق بھی اہم بات چیت کی گئی۔
ذرائع نے بتایا کہ گورنر سندھ کامران ٹیسوری نے آصف زرداری سے کہا کہ آپ مفاہمت کے بادشاہ ہیں۔ پنجاب اور بلوچستان کی طرح مفاہمتی سیاست سندھ میں بھی پروان چڑھائیں، خصوصاً کراچی کے حالات کی بہتری کے لیے کردار ادا کریں۔
ذرائع کے مطابق گورنر سندھ نے سابق صدر سے کہا کہ ایم کیو ایم کی شکایات کا ازالہ کرکے اچھا ورکنگ ریلیشن شپ قائم کیا جائے۔ کراچی میں اسٹریٹ کرائمز معاملے پر پولیس اور حکومتی کارکردگی بہتر بنائی جائے۔ صحت، تعلیم سمیت دیگر شعبوں میں بہتری کی ضرورت ہے۔
ذرائع نے بتایا کہ ملاقات میں سابق صدر آصف زرداری نے گورنر سندھ کامران ٹیسوری سے کہا کہ ایم کیو ایم ہماری اہم اتحادی ہے اور ان کے جائز مطالبات کو مانتے ہیں۔ چاہتے ہیں کہ ایم کیو ایم کو ساتھ لے کر چلیں۔
آصف زرداری نے یقین دلایا کہ سندھ کی ترقی، استحکام اور امن کیلیے میرا بھرپور تعاون اور کردار ہمیشہ رہے گا۔
