منی لانڈرنگ کیس: آصف زرداری نے ضمانتی مچلکے جمع کروا دیے -
The news is by your side.

Advertisement

منی لانڈرنگ کیس: آصف زرداری نے ضمانتی مچلکے جمع کروا دیے

کراچی: سابق صدر آصف علی زرداری نے منی لانڈرنگ کیس میں ضمانتی مچلکے جمع کروا دیے۔ انہوں نے کہا کہ جس ملک میں چیف جسٹس چھاپے مارے، کیا کہیں گے۔

تفصیلات کے مطابق منی لانڈرنگ کیس میں سابق صدر آصف علی زرداری نے ضمانتی مچلکے جمع کروا دیے۔ 20 لاکھ کے مچلکوں پر ضامن عاشق حسین اور خود آصف زرداری نے دستخط کیے۔

خیال رہے کہ بینکنگ کورٹ نے آصف علی زرداری کے وارنٹ گرفتاری جاری کیے تھے جس پر انہوں نے اسلام آباد ہائی کورٹ سے حفاظتی ضمانت حاصل کی تھی، بعد ازاں عدالت نے انہیں 3 ستمبر تک متعلقہ ٹرائل کورٹ میں پیش ہونے کا حکم دیا تھا۔

گزشتہ روز آصف زرداری کراچی کی بینکنگ کورٹ میں پیش ہوئے جہاں عدالت نے 20 لاکھ روپے کے عوض ان کی عبوری حفاظتی ضمانت منظور کی۔

بینکنگ کورٹ نے سابق صدر کی 15 دن کی حفاظتی ضمانت منظور کی تھی۔

مزید پڑھیں: آصف علی زرداری اور فریال تالپور ایف آئی اے میں پیش

بینکنگ کورٹ کے باہر میڈیا سے گفتگو کے دوران صحافی نے سوال کیا کہ آج آپ پھر گاڑی میں آئے، ہیلی کاپٹر میں نہیں آئے۔ آصف زرداری نے کہا کہ ہیلی کاپٹر کی بات ہو رہی ہے دیکھیں کب ملتا ہے۔

چیف جسٹس کے چھاپے میں شرجیل میمن کے کمرے سے شراب برآمدگی کے متعلق آصف زرداری نے کہا کہ جس ملک میں چیف جسٹس چھاپے مارے، کیا کہیں گے۔

ان سے پوچھا گیا کہ آپ کو چیف جسٹس کے دوروں پر اعتراض ہے، جس پر زرداری نے کہا کہ سپریم کورٹ میں اور بھی کیسز ہیں ان پر بھی توجہ ہونی چاہیئے۔

صدارتی انتخاب کے معاملے پر آصف زرداری نے کہا کہ ہو سکتا ہے مولانا فضل الرحمٰن دستبردار ہوجائیں۔

Comments

comments

یہ بھی پڑھیں