کراچی : محکمہ موسمیات نے کل ذوالحج کا چاند نظر آنے کی پیشگوئی کردی ، جس کے بعد عیدالضحیٰ 12اگست کوہوگی، غروب آفتاب کے بعد چاند 53 منٹ تک افق پر دیکھا جاسکےگا۔
تفصیلات کے مطابق محکمہ موسمیات نے ذوالحج کے چاندکی پیشگوئی کرتے ہوئے کہا کل ذوالحج کا چاند نظر آنے کے قوی امکانات ہیں ، چاند نظر آنے کی صورت میں عیدالضحیٰ12اگست کوہوگی۔
محکمہ موسمیات کا کہنا ہے کہ چاند آج 8:12 پر پیدا ہونا شروع ہوجائےگا،7 : 17منٹ پر سورج طلوع ہو جائےگا، غروب آفتاب کے بعد چاند 53 منٹ تک افق پر دیکھا جاسکےگا، چاند کی عمر35 گھنٹے 29 منٹ ہوگی۔
محکمہ موسمیات کے مطابق کل ملک کے بیشتر حصوں میں مطلع جزوی طور پر ابر الود رہنے کا امکان ہے۔
دوسری جانب چیئرمین مفتی منیب الرحمان نے ذوالحج کا چاند دیکھنے کے لیے مرکزی رویت ہلال کمیٹی کا اجلاس کل طلب کرلیا ہے ، اجلاس بعد نماز عصر میٹ کمپلیکس کراچی میں منعقد ہوگا، جس میں چاند نظر آنے یا نہ آنے کا اعلان کیا جائے گا۔
حکومت پاکستان کی جانب سے عید الضحیٰ پر سرکاری تعطیلات کااعلان کردیا ہے ، جس کے مطابق چھٹیاں 12 سے 15 اگست تک ہوں گی۔
خیال رہے کہ ذوالحج اسلامی سال کا آخری مہینہ ہے جس میں استطاعت رکھنے والے فرزندان اسلام فریضہ حج ادا کرتے جبکہ سنتِ ابراہیمی کو زندہ رکھتے ہوئے حکم خداوندی کے مطابق اپنے جانور بھی قربان کرتے ہیں۔
