ہرارے: زمبابوے نے پاکستان کے خلاف ٹی ٹوئنٹی اسکواڈ کا اعلان کردیا ہے، طویل عرصے بعد جارح مزاج بلے باز برینڈن ٹیلر کی ٹیم میں واپسی ہوئی ہے۔
تفصیلات کے مطابق زمبابوے کرکٹ بورڈ نے پاکستان کے خلاف ٹی ٹوئنٹی سیریز کیلئے پندرہ رکنی اسکواڈ کا اعلان کردیا ہے، ٹی ٹوئنٹی ٹیم کی قیادت شان ولیمز کریں گے، زمبابوے ٹیم میں کافی عرصے بعد برینڈنٹ ٹیلر اور گریک ایرون کی واپسی ہوئی ہے، اس کے علاوہ زمبابوے کے اسکواڈ میں تین ریزرو کھلاڑیوں کو بھی شامل کیا گیا ہے۔
پاکستان اور زمبابوے کے درمیان ٹی ٹوئنٹی سیریز کا پہلا میچ رواں ماہ کی اکیس تاریخ کو ہرارے میں کھیلا جائے گا۔
پاکستان کرکٹ ٹیم کے دورہ زمبابوے کا شیڈول
جنوبی افریقا میں ون ڈے اور ٹی ٹوئنٹی سیریز اپنے نام کرنے والی گرین شرٹس کل جوہانسبرگ سے ہرارے پہنچیں گے، جہاں وہ اپنے مشن کی شروعات کرے گی، تین ٹی 20 اور دو ٹیسٹ میچز کی سیریز کا آغاز 21 اپریل سے ہو گا، ٹی ٹوئنٹی میچز21، 23 اور 25 اپریل کوکھیلے جائیں گے۔
دونوں ٹیموں کے درمیان پہلا ٹیسٹ میچ 29 اپریل اور دوسرا 7 مئی سے شروع ہوگا، سیریز کےتمام میچز ہرارے اسپورٹس کلب میں کھیلےجائیں گے۔
یہ بھی پڑھیں: زمبابوے نے سپر اوور میں پاکستان کو شکست دے دی
واضح رہے کہ گذشتہ سال زمبابوے نے پاکستان کا دورہ کیا تھا،دورے میں ٹی ٹوئنٹی اور ایک روزہ میچز کی سیریز کھیلی گئی تھی، گرین شرٹس نے ایک روزہ سیریز سمیت ٹی ٹوئنٹی سیریز کو اپنے نام کیا تھا۔
شائقین کرکٹ کو گذشتہ سال نومبر میں پاکستان اور زمبابوے کے درمیان کھیلا جانے والا تیسرا ایک روزہ میچ طویل عرصے تک یاد رہےگا اس میچ میں زمبابوے نے پاکستان کو سپر اوور میں شکست سے دوچار کیا تھا۔
