The news is by your side.

Advertisement

زویا ناصر نے منگنی توڑ دی

کراچی: ٹی وی اداکارہ اور بیوٹیشن زویا ناصر نے اپنے جرمن منگیتر سے منگنی توڑنے کا اعلان کر دیا ہے۔

تفصیلات کے مطابق پاکستان کے معروف فلم نویس، نغمہ نگار اور فلم ساز ناصر ادیب کی بیٹی زویا ناصر نے منگیتر کرسچن بیزمن سے منگنی توڑ دی ہے۔

سفری ویڈیو بنانے والے جرمن ولاگر اور انفلوئنسر کرسچن بیزمن نے فلسطین کے حق میں آواز اٹھانے سے انکار کیا تھا، انھوں نے پاکستان کو تیسری دنیا کا ملک بھی کہا تھا جس پر انھیں شدید تنقید کا سامنا کرنا پڑا۔

زویا ناصر کا منگنی توڑنے کا فیصلہ کرسچن بیزمن کی جانب سے سوشل میڈیا پر فلسطین میں اسرائیلی مظالم پر مؤقف سامنے آنے کے بعد آیا ہے، بیزمن نے پاکستان کو تیسری دنیا کا ملک قرار دیتے ہوئے یہ بھی کہا تھا کہ دعاؤں سے کچھ نہیں ہوتا۔

 

View this post on Instagram

 

A post shared by Zoya Nasir (@zoyanasir)

انسٹاگرام پوسٹ میں زویا ناصر نے لکھا میں انتہائی بوجھل دل کے ساتھ یہ اعلان کر رہی ہوں کہ کرسچن بیزمن اور میرے درمیان رشتہ ختم ہو گیا ہے، میری ثقافت، میرے ملک، میرے عوام کے بارے میں اس کے مؤقف میں اچانک تبدیلی اور میرے مذہب کے بارے میں اس کی بے حسی نے مجھے یہ مشکل اور اٹل فیصلہ لینے پر مجبور کیا ہے۔

انھون نے مزید لکھا کہ کچھ ایسی مذہبی اور معاشرتی حدود ہیں جن سے کسی بھی طور تجاوز نہیں کیا جا سکتا، لہٰذا راستے جدا کرنے کا فیصلہ کیا گیا ہے، رواداری، ایک دوسرے کا احترام وہ خوبیاں ہیں جن کا ہمیں ہمیشہ پابند رہنا چاہیے۔

زویا نے لکھا کہ میں اپنے اللہ سے دعا مانگتی ہوں کہ وہ مجھے دنیاوی جذباتی ٹوٹ پھوٹ سے بچنے کے لیے قوت دے، میں کرس کے روشن اور پُرمسرت مستقبل کے لیے دعاگو ہوں، اور میں درخواست کرتی ہوں کہ اس جذباتی دور سے گزرنے کے لیے میری اور میرے خاندان کے لیے پردہ پوشی کا رویہ اختیار کریں۔

Comments

یہ بھی پڑھیں