اسلام آباد: وزیر اعظم عمران خان کے معاون خصوصی زلفی بخاری متحدہ عرب امارات کے حکام کے ساتھ ملاقات کریں گے جس میں امارات بے روزگار ہو جانے والے پاکستانیوں کا معاملہ اٹھایا جائے گا۔
تفصیلات کے مطابق متحدہ عرب امارات میں مقیم پاکستانیوں کو درپیش مسائل حل کرنے کے لیے پاکستان اور اماراتی حکام کے درمیان اعلیٰ سطح کے رابطے جاری ہیں۔ دونوں ممالک کے وزرا برائے افرادی قوت کے درمیان کرونا وائرس کے دوران پہلی ملاقات طے ہوگئی۔
وزیر اعظم عمران خان کے معاون خصوصی زلفی بخاری اہم دورے پر آج امارات روانہ ہوجائیں گے۔ زلفی بخاری امارات کے وزیر برائے افرادی قوت سے اہم ملاقات کریں گے۔
ملاقات میں امارات میں مقیم پاکستانیوں کو درپیش مسائل کو حل کرنے پر مشاورت ہوگی جبکہ کرونا وائرس کے دوران بے روزگار ہونے والے پاکستانیوں کا معاملہ بھی اٹھایا جائے گا۔
اپنے دورے کے دوران زلفی بخاری پاکستانی قونصلیٹ کا دورہ کریں گے جبکہ سفارتخانے کے حکام اور کرونا کی صورتحال میں متحرک کردار ادا کرنے والی پاکستانی کمیونٹی سے ملاقاتیں کریں گے۔
زلفی بخاری کرونا وائرس کے دوران کمیونٹی کو بھرپور تعاون فراہم کرنے پر خراج تحسین پیش کریں گے جبکہ اوور سیز پاکستانیوں کی آسانیوں کے لیے مختلف تجاویز پر بھی مشاورت کی جائے گی۔
