ڈی آئی خان میں نامعلوم افراد کی فائرنگ سے 4 کسٹمز اہلکار شہید ہوگئے۔
اے آر وائی نیوز کے مطابق ڈی آئی خان کے علاقے سگو روڈ پر نامعلوم افراد کی فائرنگ کی جس کے نتیجے میں کسٹمز کے 4 اہلکار شہید ہوگئے۔
پولیس کا بتانا ہے کہ فائرنگ کے بعد گاڑی کے ٹکرانے سے کار سوار بچی اور ایک شخص جاں بحق ہوا، بچی اور شہری کو اسپتال منتقل کیا گیا لیکن وہ جانبر نہ ہوسکے۔
پولیس کے مطابق کسٹمز کے اہلکار ڈی آئی خان کوئٹہ روڈ پر معمول کی ڈیوٹی پر تھے جب نامعلوم افراد نے انہیں نشانہ بنایا۔
پولیس حکام کا کہنا ہے کہ ملزمان فائرنگ کے بعد فرار ہوگئے۔
واضح رہے کہ گزشتہ ماہ ڈیرہ اسماعیل خان میں سیکیورٹی فورسز کے قافلے پر خودکش حملہ ہوا تھا، خودکش بمبار نے سیکیورٹی فورسز کے قافلے سے اپنی گاڑی ٹکرا دی تھی اور اور خود کو دھماکے سے اڑا لیا تھا۔
آئی ایس پی آر کاکہنا تھا کہ دھماکے کے نیتجے میں دو جوان شہید ہوگئے ، 38 سالہ نائب صوبیدار یاسر شکیل اور 34 سالہ سپاہی طاہر نوید دونوں کا تعلق کوہاٹ سے تھا۔
