راولاکوٹ : آٹے کی قیمت میں اضافے اور بجلی بلوں میں بے تحاشہ ٹیکس کے خلاف آزاد کشمیر میں عوامی احتجاج کا سلسلہ زور پکڑتا جارہا ہے۔ مظاہرین نے ہڑتال کا اعلان کردیا۔
تفصیلات کے مطابق آزاد کشمیر کے عوام کی بڑی تعداد اور تاجر برادری نے بجلی کی لوڈشیڈنگ اور آٹے کی قیمتوں میں اضافے کے خلاف پونچھ کے ڈویژنل ہیڈ کوارٹرز راولاکوٹ میں حکومت مخالف ریلی و دھرنا دیا۔
اس موقع پر مظاہرین کی جانب سے حکمران اشرفیہ کی شاہانہ مراعات کیخلاف بھی شدید نعرے بازی کی گئی، تاجران، سول سوسائٹی، عوامی ایکشن کمیٹیز نے سول نافرمانی تحریک کی کال دے دی۔ وکلانے بھی سول نافرمانی کی تحریک جاری رکھنے کی حمایت کر دی۔
راولاکوٹ میں ہونے والے مظاہرے میں ہزاروں افراد نے ریلی کی شکل میں اپنے گھروں کے بجلی کے بل اجتماعی طور پر جلائے، مظاہرین کا مطالبہ تھا کہ آزاد کشمیر کو لوڈشیڈنگ سے مستثنیٰ، سستا اور معیاری آٹا مہیا کیا جائے۔
ان کا کہنا تھا کہ آزاد کشمیر میں نیشنل گرڈ اسٹیشن قائم کرکے گلگت بلتستان (جی بی) طرز پر بجلی کا ٹیرف مقرر کیا جائے،
عوامی ایکشن کمیٹی نے 31اگست کو مظفرآباد،7ستمبر کو پونچھ و میرپور میں پہیہ جام ہڑتال کا اعلان کردیا، مساجد سے بل جمع کرانے سے انکار کے اعلانات کیے جاتے رہے۔
