برازیلیا: برازیل میں طوفانی بارش اور ہول ناک سیلاب میں 83 افراد ہلاک اور درجنوں لاپتا ہو گئے ہیں۔
غیر ملکی میڈیا رپورٹس کے مطابق برازیل میں طوفانی بارش کے بعد سیلاب نے تباہی پھیلا دی، جنوبی ریاست ریو گرانڈے ڈوسل اور اطراف میں مختلف حادثات میں اسی سے زائد افراد ہلاک ہو گئے۔
ریاستی شہری دفاع کے حکام نے اتوار کو بتایا کہ سیلاب میں 103 افراد لاپتا ہیں، بارش کے بعد لینڈ سلائیڈنگ اور سیلاب نے کئی قصبوں، سڑکوں اور پلوں کو تباہ کر دیا ہے، دریاؤں اور جھیلوں میں پانی کی سطح بلند ہو گئی، مجموعی طور پر سیلاب سے 500 شہروں کو نقصان پہنچا ہے۔
سڑکیں ندی نالوں میں تبدیل ہو چکی ہیں، ایک ڈیم ٹوٹ چکا ہے جب کہ دوسرا ڈیم بھی ٹوٹنے کا خدشہ ہے، 1 لاکھ 15 ہزار سے زائد افراد بے گھر ہو گئے ہیں، تقریباً 16,000 نے اسکولوں، جمنازیموں اور دیگر عارضی پناہ گاہوں میں پناہ لی ہے۔
ریاست ریو گرانڈے ڈوسل کے گورنر ایڈورڈو لیٹی نے اتوار کی صبح کہا ’’ہم جس تباہی کا نشانہ بنے ہیں وہ بے مثال ہے، ریاست کو پھر سے تعمیر کرنے کے لیے ایک مارشل پلان کی ضرورت ہوگی۔‘‘
