خاتون پر ڈائن ہونے کا الزام لگا کر دیور نے سوتے میں اسے فائرنگ کرکے قتل کردیا، مقتولہ چار بچوں کی ماں تھی۔
بھارتی ریاست بہار کے ضلع مظفر پور میں عجیب واقع پیش آیا ہے جہاں دیور نے ڈائن ہونے کا الزام لگا کر اپنی بھابی کو ہلاک کردیا۔ مذکورہ خاتون سورہی تھی تو دیور نے چپکے سے اسے گولیوں کا نشانہ بنایا جس سے اس کی موت واقع ہوگئی۔
گاؤں بھوانی پور میں فائرنگ کے بعد نوجوان ملزم فرار ہو گیا جبکہ واقعہ کی اطلاع ملتے ہی پولیس نے موقع پر پہنچ کر معاملے کی تفتیش شروع کردی ہے۔
لاش کو پوسٹ مارٹم کے لیے اسپتال منتقل کردیا گیا ہے، مقتول خاتون کی شناخت گیتا دیوی کے نام سے ہوئی ہے جو رامیشور ساہنی نامی شخص کی بیوی تھی۔
گھر والوں نے بتایا کہ گیتا پر اس کے دیور سنتوش نے ڈائن ہونے کا الزام لگایا تھا۔ اس بات کو لے کر دونوں بھائیوں اور بھابھی کے درمیان دن بھر جھگڑا ہوتا رہا۔ رات کو جب خاتون سو رہی تھی تو سنتوش نے بھابھی کو گولی مار دی۔
گیتا کی شادی 2012 میں ہوئی تھی جبکہ اس کے چار بچے بھی ہیں۔ ساس اور دیور اکثر خاتون پر ڈائن ہونے کا الزام لگا کر جھگڑتے رہتے تھے۔
پولیس کا کہنا ہے کہ درخواست موصول ہونے پر مزید کارروائی کی جائے گی، قتل کے بعد دونوں مفرور ماں بیٹا کی گرفتاری کے لیے کارروائی کی جا رہی ہے۔