لندن: برطانیہ میں کنزرویٹیو پارٹی کی جانب سے ہونے والی کانفرنس بدمزگی کا شکار ہوگئی، کانفرنس میں موجود شرکار نے وزیراعظم تھریسامے سے استعفے کا مطالبہ کردیا۔
تفصیلات کے مطابق برطانیہ کی کاؤنٹی ویلز میں کنزرویٹیوپارٹی کی جانب سے کانفرنس منعقد کی گئی، کانفرس کےشرکاء نے وزیراعظم تھریسامے پرکڑی تنقید کرتے ہوئے ان سے مستعفٰی ہونے کا مطالبہ کردیا۔
غیر ملکی خبر رساں ادارے کے مطابق برطانوی وزیراعظم تھریسا مے خطاب کرنے جیسے ہی اسٹیج پر آئیں تو ایک شخص نے کھڑے ہوکر بلدیاتی انتخابات میں شکست کا ذمہ دار انہیں ٹھرایا۔
کانفرنس کے شرکا نے وزیراعظم کو مخاطب کرتے ہوئے کہا آپ استعفیٰ کیوں نہیں دیتیں ؟ ہم آپ کو اقتدار میں دیکھنا نہیں چاہتے۔
کانفرنس کو مزید بدمزگی سے بچانے کے لیے سیکیورٹی اہلکار نے مداخلت کار کو کمرے سے باہر نکال دیا۔
برطانوی وزیراعظم نے کہا بلدیاتی انتخاب کامرحلہ ان کی جماعت کے لیے بہت سخت تھا اور یورپی یونین سےعلیحدگی میں تاخیر کے باعث لوگ مایوسی کاشکار ہیں۔
خیال رہے کہ برطانیہ میں دو روز قبل کل 248 کونسلوں کے انتخابات ہوئے، جن میں 8425 نشستوں پر 33 ہزار کے قریب امیدوار میدان میں اترے جن میں سیکڑوں برٹش پاکستانی بھی شامل تھے۔
دوسری جانب بریگزٹ ڈیل کے حوالے سے برطانوی وزیراعظم تھریسامے شدید دباؤ کا شکار ہیں، البتہ یورپی رہنما برائے بریگزٹ ڈیل مذاکرات نے رواں ہفتے کو اہمیت کا حامل قرار دیا ہے۔
برطانیہ میں بلدیاتی انتخابات، تاریخ میں پہلی بار500سےزائدپاکستانی نژاد برطانوی امیدوار میدان میں
واضح رہے کہ برطانیہ کو 2016 کے ریفرنڈم کے مطابق 29 مارچ کو یورپی یونین سے علیحدہ ہونا تھا تاہم ہاؤس آف کامنز کی جانب سے متعدد مرتبہ بریگزٹ معاہدے کی منسوخی کے باعث بریگزٹ میں 12 اپریل توسیع کی گئی تھی۔
