مشیگن: سابق امریکی صدر ڈونلڈ ٹرمپ نے انتخاب سے متعلق سیاسی ریلیاں پھر سے شروع کر دی ہیں، ریاست مشیگن میں ایک ریلی سے خطاب کرتے ہوئے انھوں نے کہا ’’صرف میں ہی دنیا کو تیسری جنگ عظیم سے بچا سکتا ہوں۔‘‘
نومبر میں ہونے والی صدارتی دوڑ کی تیاری کے لیے سابق صدر ڈونلڈ ٹرمپ نے بدھ کو دو ریاستوں وسکونسن اور مشیگن میں انتخابی ریلیاں نکالیں، گزشتہ دنوں وہ نیویارک میں مجرمانہ مقدمے میں عدالت میں پیشیاں بھگتاتے رہے، جہاں ان پر ایک فلمی اداکارہ کو چُپ رہنے کے لیے دی جانے والی رقم (hush money trial) کو چھپانے کے لیے جعلی کاروباری ریکارڈ بنانے کا الزام ہے۔
ریاست مشیگن میں انتخابی ریلی سے خطاب میں ڈونلڈ ٹرمپ نے کہا صرف میں ہی دنیا کو تیسری جنگ عظیم سے بچا سکتا ہوں، صدر بائیڈن کی کمزوریوں نے دنیا کو جوہری جنگ کے دہانے پر پہنچا دیا ہے، میں دنیا میں امن لاؤں گا، اور اقتدار میں آنے کے بعد اسرائیل سے بھی بڑا آئرن ڈوم بنائیں گے۔
ٹرمپ نے امریکی یونیورسٹیوں میں مظاہرین کے خلاف کریک ڈاؤن کی حمایت کر دی، اور اسرائیل مخالف، فسلطین حمایتی احتجاج پر سخت تنقید کی۔
ریاست وسکونسن میں تقریر میں ڈونلڈ ٹرمپ نے کہا کہ امریکا میں آباد فلسطینی پناہ گزین یہاں بھی ’’جہاد‘‘ کر سکتے ہیں اور 7 اکتوبر کے طرز کے حملے کر سکتے ہیں۔ انھوں نے مسلم ممالک سے سفری پابندی کے نفاذ کی اپنی تجویز پر عمل کا بھی عزم کیا۔
