کراچی : شہرقائد کے علاقے دھنی بخش گوٹھ میں تحریک انصاف اور آزاد امیدوار کے کارکنان میں جھگڑا ہوا جس کے نتیجے میں 8 افراد زخمی ہوگئے۔
تفصیلات کے مطابق کراچی کے علاقے دھنی گوٹھ میں انتخابی مہم کے دوران پی ٹی آئی اور آزاد امیدوار کے کارکنان کے درمیان تصادم میں 8 افراد زخمی ہوگئے۔
پولیس کے مطابق تصادم میں زخمی ہونے والے 8 افراد کو طبی امداد کے لیے اسپتال منتقل کردیا گیا۔
پولیس کا کہنا ہے کہ تحریک انصاف اور آزاد امیدوار کے درمیان جھگڑا ریلی میں موجود گاڑیوں کو راستہ نہ دینے پر ہوا جبکہ زخمیوں میں پی ایس 99 سے آزادامیدوار جان محمد رند بھی شامل ہیں۔
کراچی، پی ٹی آئی اور پی پی کارکنان میں تصادم، تین گاڑیاں نذرآتش
خیال رہے کہ رواں سال 8 مئی کوکراچی میں گلشن اقبال کے حکیم سعید گراؤنڈ میں پی ٹی آئی اور پی پی کارکنان کے درمیان خونریز تصادم کے نتیجے میں متعدد افراد زخمی ہوگئے تھے۔
پاکستان پیپلزپارٹی کے رہنما سعید غنی کا کہنا تھا کہ ان کی جماعت کے 25 سے زائد کارکنان زخمی ہوئے۔
دوسری جانب پاکستان تحریک انصاف کے رہنما علی زیدی کا کہنا تھا کہ پیپلزپارٹی کے کارکنان کی جانب سے پہل کی گئی اور ان کے کیمپ کو آگ لگا دی گئی۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
