اسلام آباد: پاکستان میں آئی ایم ایف کی نمائندہ ایستھر پریز نے کہا ہے کہ پاکستان کو بجٹ پاس کرنے سے پہلے آئی ایم ایف بورڈ کے آخری جائزے کا سامنا کرنا پڑے گا۔
تفصیلات کے مطابق پاکستان میں آئی ایم ایف کی نمائندہ ایستھر پریز نے غیر ملکی خبر رساں ایجنسی سے رابطے میں کہا ہے کہ پاکستان کے لیے موجودہ حالات میں موجودہ بیل آؤٹ پیکج کے تحت 9 جون کا بجٹ اہم ہے۔
انھوں نے کہا بجٹ سے قبل پاکستان کے پاس صرف ایک باقی رہ جانے والا بورڈ جائزہ ہو سکتا ہے، بجٹ میں اصلاحات کرنا کامیاب جائزے کی جانب ایک قدم ہے۔
ایستھر پریز کا کہنا تھا کہ پاکستان میں ایکسچینج مارکیٹ کو آزادانہ کام کرنے کا موقع دیا جائے، امید ہے پاکستان بجٹ میں آئی ایم ایف کے اہداف کے حصول کو شامل کرے گا۔
نمائندہ آئی ایم ایف نے کہا پاکستان کو 6 ارب ڈالر کے فنانسنگ گیپ کو پورا کرنا ہے، پاکستان کو 6 ارب ڈالر کے لیے پُر اعتماد فنڈنگ کی یقین دہانی کی ضرورت ہے۔
