اسلام آباد: عالمی مالیاتی فنڈ (آئی ایم ایف) نے پاکستان کی طویل مدتی قرض پروگرام کیلئےدرخواست منظور کرلی۔
تفصیلات کے مطابق عالمی مالیاتی فنڈ (آئی ایم ایف) نے پاکستان کی ایکسٹنڈڈفنڈ فیسلیٹی کی درخواست منظورکرلی۔
ذرائع نے بتایا عالمی مالیاتی فنڈ نے پاکستان کی 6 سے8ارب ڈالر کی درخواست منظورکی تاہم موسمیاتی تبدیلیوں کے نقصان کی فنڈنگ کی درخواست پرآئی ایم ایف پھر غورکرے گا۔
ذرائع کا کہنا تھا کہ موسمیاتی تبدیلیوں کی درخواست مئی کے دورہ پاکستان پرمشاورت بعد منظور ہوگی۔
خیال رہے پاکستان کی 6 سے 8 ارب ڈالر اور 3 سے 4 سالہ قرض پروگرام کی کوششیں جاری ہے ، پاکستان نے عالمی مالیاتی فنڈ سے 2 قرض پروگرام لینے کےلیےبات چیت کی۔
ذرائع وزارت خزانہ نے بتایا تھا کہ نئے قرض پروگرام کیلئے 2 درخواستیں دی گئیں، 8 ارب ڈالر تک کے ایکسٹنڈڈفنڈ فیسلیٹی کیلئے پہلی درخواست دی گئی۔
ذرائع کا کہنا تھا کہ موسمیاتی تبدیلیوں کے نقصانات پرازسرنوتعمیرات کیلئےاضافی 1.2ارب ڈالر فنڈ پروگرام کی بھی کوشش ہیں تاہم آئی ایم ایف مشن مذاکرات کیلئے آئندہ ماہ پاکستان پہنچ جائےگا، مشن نئے قرض پروگرام،آئندہ مالی سال کے بجٹ کی تیاری میں معاشی ٹیم کیساتھ کام کرے گا۔
گذشتہ روز وزیر خزانہ محمد اورنگزیب نے رائٹرز کو بتایا تھا کہ پاکستان کو امید ہے کہ مئی میں آئی ایم ایف کے نئے قرضے پر اتفاق ہو جائے گا۔
وفاقی وزیر خزانہ محمد اورنگزیب کا کہنا تھا کہ پاکستان کو کم ازکم 6 ارب ڈالر قرض پروگرام کی توقع ہے، آئی ایم ایف سے موجودہ قرض پروگرام اپریل کے آخر میں ختم ہو گا۔
انھوں نے بتایا تھا کہ قرضوں کی واپسی کیلئے ریٹنگ ایجنسیوں کے ساتھ بات چیت کا آغاز کر دیا ہے ، پاکستان میکرو اکنامک استحکام کیلئے اصلاحاتی ایجنڈے کو انجام دے رہا ہے اقتصادی ترقی کیلئے ضروری ڈھانچہ جاتی اصلاحات کی جا رہی ہیں اصلاحاتی ایجنڈے کو جاری رکھنے کیلئےطویل اور بڑا قرض پروگرام ضروری ہے۔
