اسلام آباد : پاکستان نے گلوبل وارمنگ کے اثرات کا معاملہ عالمی فورم پر اٹھانے کا فیصلہ کرلیا۔
تفصیلات کے مطابق گلوبل وارمنگ کے پاکستان پر اثرات کا معاملہ عالمی فورم پر اٹھانے کا فیصلہ کرلیا گیا۔
پاکستان کی جانب سے انٹرپارلیمنٹری یونین اجلاس میں سیلابی صورتحال زیر غور لانے کی دراخوست کی گئی۔
اس حوالے سے چیئرمین سینیٹ صادق سنجرانی نے آئی پی یو کے صدر دوآر تے پاشیکو کے نام خط لکھا ، جس میں کہا گیا کہ پاکستان میں سیلاب سے33ملین لوگ متاثر ہوئے۔
خط کے متن میں کہا گیا کہ سیلاب سے1400لوگ جاں بحق اورتقریباًایک تہائی ملک ڈوبا، سیلاب سے 12 لاکھ گھر تباہ اور 10 ارب ڈالر کا نقصان ہوا۔
چیئرمین سینیٹ نے کہا کہ پاکستان گرین ہاؤس گیس میں ایک فیصدسےبھی کم کاحصہ دارہے، اجلاس میں سیلابی صورتحال کو بطور ایمرجنسی ایجنڈا آئٹم شامل کیا جائے۔
خط میں کہنا تھا کہ آئی پی یو اجلاس سے ہی ہم ممبر ممالک کو امداد اور بحالی کی دارخوست کرسکتے ہیں ، آئی پی یوممبرز کم کاربن خارج کرنے والے ممالک کو بچانے کیلئے اقدامات کریں۔
صادق سنجرانی نے مزید کہا کہ امداد صرف سخاوت نہیں بلکہ انصاف کا تقاضا بھی ہے، انٹر پارلیمنٹری یونین 178 ممالک پر مشتمل سب سے بڑی عالمی پارلیمانی تنظیم ہے۔
