پاکستان کرکٹ بورڈ کے چیئرمین محسن نقوی نے ٹی 20 ورلڈ کپ جیتنے پر ہر کھلاڑی کو ایک لاکھ ڈالر انعام دینے کا اعلان کردیا۔
چیئرمین پاکستان کرکٹ بورڈ (پی سی بی) محسن نقوی قومی کھلاڑیوں کی حوصلہ افزائی کیلئے قذافی اسٹیڈیم پہنچ گئے جہاں انہوں نے کھلاڑیوں اور آفیشلز سے ملاقات کی۔
چیئرمین پی سی بی محسن نقوی 2 گھنٹے تک کھلاڑیوں کیساتھ رہے، آفیشلز سے گفتگو کی جبکہ کھلاڑیوں کے ساتھ کھیل کی حکمت عملی پر تفصیلی بات چیت کی۔
اس دوران چیئرمین پی سی بی محسن نقوی نے ٹی 20 ورلڈ کپ جیتنے پر ہر کھلاڑی کو ایک لاکھ ڈالر انعام دینے کا اعلان کیا اور کہا کہ پاکستان کی جیت کے سامنے اس انعام کی کوئی حیثیت نہیں ہے۔
چیئرمین پی سی بی نے کھلاڑیوں سے کہا کہ امید ہے آپ اس بار پاکستانی سبز ہلالی پرچم بلند کریں گے، کسی دباؤ کے بغیر میدان میں اتریں اور بھرپور مقابلہ کریں، میدان میں مقابلہ ہوتا نظر آنا چاہیے۔
چیئرمین پی سی بی نے کہا کہ جیت آپ کے لئے اور ہار میرے لیے ہوگی، کسی کی پرواہ نہ کریں صرف پاکستان کے لئے کھیلیں، اگر میدان میں ٹیم ورک کا مظاہرہ کریں انشاللہ فتح قدم چومے گی۔
انہوں نے مزید کہا کہ تمام کھلاڑی متحد اور اکٹھے ہیں، شاہین آفریدی ورلڈ کپ میں بھرپور پرفارمنس دیں گے، قوم کو آپ سے بہت سی توقعات ہیں، آپ نے پورا اترنا ہے۔
