ٹوکیو: جاپان میں ہونے والی ایک تحقیق میں فائزر اور بائیو این ٹیک کی کرونا وائرس ویکسین گاما قسم کے وائرس کے خلاف بھی مؤثر ثابت ہو گئی ہے۔
تفصیلات کے مطابق ایک تحقیقی گروپ نے توقع ظاہر کی ہے کہ امریکی کمپنی فائزر کی کرونا ویکسین گاماویرینٹ کے خلاف بھی مؤثر ہوگی، کرونا وائرس کی گاما قسم سب سے پہلے برازیل میں سامنے آئی تھی۔
اس سلسلے میں یونیورسٹی آف ٹوکیو کے ادارۂ طبی سائنس کے پراجیکٹ پروفیسر، کاوا اوکا یوشی ہیرو کی زیرِ قیادت تحقیقی گروپ نے اپنی جائزہ رپورٹ ایک امریکی سائنسی جریدے میں شائع کی ہے۔
تحقیق کے دوران سائنس دانوں نے اصل کرونا وائرس سے متاثر شدہ ہیمسٹرز (چوہے کی قسم کا ایک جانور) میں گاما قسم داخل کی تھی، تین دن بعد انھوں نے ان ہمیسٹرز کی ناک میں گاما قسم کی باقیات پائیں، لیکن چھٹے روز ایسی کوئی علامت نہیں پائی گئی۔
تحقیق کے نتائج میں دیکھا گیا کہ ایسے ہیمسٹرز میں جو اس سے پہلے کرونا وائرس سے کبھی متاثر نہیں ہوئے تھے، ان میں چھٹے روز بھی گاما قسم کی باقیات دریافت ہوئیں۔
محققین نے یہ تصدیق بھی کر لی ہے کہ جن افراد کو فائزر کی ویکسین لگ چکی ہے، ان میں ایسی اینٹی باڈیز پائی جاتی ہیں جو گاما قسم کے خلاف بھی تقریباً اتنی ہی مؤثر ہیں، جتنی اصل وائرس کے خلاف ہیں۔
اس گروپ کا کہنا ہے کہ ریسرچ کے یہ نتائج گاما قسم کے خطرات کا اندازہ لگانے کے عمل میں کلیدی معلومات فراہم کرتے ہیں۔
