آرمی چیف جنرل عاصم منیر نے کہا ہے کہ ہم سب مل کر ٹیم پاکستان ہیں ملک کی ترقی کے سفر میں رخنہ ڈالنے اور توجہ ہٹانے والوں کی کوششیں ناکام ہوں گی۔
اے آر وائی نیوز کے مطابق آرمی چیف جنرل عاصم منیر نے گرین پاکستان انیشیٹو کانفرنس سے خطاب کرتے ہوئے کہا ہے کہ ہم سب مل کر ٹیم پاکستان ہیں۔ ملک کی ترقی کے سفر میں رخنہ ڈالنے اور توجہ ہٹانے والوں کی کوششیں ناکام ہوں گی۔
جنرل عاصم منیر نے کہا کہ آج کے دور میں معاشی استحکام کے بغیر مکمل خود مختاری کا تصور ممکن نہیں۔ پاکستان کی خوشحالی اور ترقی کے سفر میں کسی قسم کا عدم استحکام برداشت نہیں کیا جائیگا۔
آرمی چیف نے مزید کہا کہ منفی پروپیگنڈا، سوشل میڈیا ٹرائلز ہماری توجہ ترقی اور خوشحالی کیلیے کام کرنے سے نہیں روک سکتے۔ آئیے ہم سب مل کر منفی قوتوں کو مسترد کریں اور پاکستان کی ترقی واستحکام کے سفر پر مرکوز رہیں۔ انشااللہ عوام کے تعاون اور سپورٹ سے پاکستان میں ترقی کا سفرجاری رکھیں گے۔