کراچی : رینجرز نے خالی پلاٹ میں چھپایا گیا اسلحے کابڑا ذخیرہ پکڑلیا، ترجمان کا کہنا ہے اسلحہ بدامنی کے لئے استعمال ہونا تھا، سائٹ ایریا اور مچھر کالونی سے پانچ ملزمان کو اسلحہ سمیت گرفتار کر لیا گیا۔
تفصیلات کے مطابق رینجرز سندھ نے مصدقہ اطلاعات پر کارروائی کرتے ہوئے ملیر کے علاقے جام گوٹھ میں خالی پلاٹ پر چھاپہ مارا، پلاٹ سے چھپایا گیا اسلحہ کا ذخیرہ برآمد کرلیا، مذکورہ اسلحہ لیاری گینگ وار کے سردار مٹھل گروہ کا بتایا جا رہا ہے۔
اسلحے میں ایک عدد 30 بور پستول، ایک عدد 22 بور پستول، ایک عدد 38 بور ریوالور، ایک آوان بم لانچر، ایک عدد ایس ایم جی بمعہ 4 عدد میگزین، ایک عدد 223 بور رائفل، ایک عدد گرنیڈ، مختلف اقسام کے 168 راؤنڈز، 10 عدد آوان بم، ایک عدد ٹیلی اسکوپ اور ڈیڑھ سو سے زائد گولیاں شامل ہیں۔
رینجرز اعلامیہ میں عوام سے اپیل کی گئی ہے کہ دہشت گردی کی روک تھام کے لئے جرائم پیشہ عناصر کے بارے میں اطلاع فوری طورپرقریبی چیک پوسٹ یا رینجرز ہیلپ لائن 1101 پر کال یا ایس ایم ایس کے ذریعے دیں، اطلاع دینے والے کا نام صیغہ راز میں رکھا جائے گا۔
دوسری جانب کراچی پولیس نے مچھر کالونی میں کارروائی کرکے تین ملزمان کو گرفتار کرلیا جبکہ سائٹ ایریا پولیس نے بھی دو ملزمان کو اسلحے سمیت گرفتار کرلیاہے۔
