سراجیو: وزیر اعظم نواز شریف تین روزہ سرکاری دورے پربوسنیا ہرزے گوینا پہنچ گئے، وزیر اعظم نواز شریف ایئرپورٹ پر اترے تو اعلیٰ حکام نے ان کا پرتپاک استقبال کیا۔وزیر اعظم اپنے دورے میں سرمایہ کاروں اور اہم سیاسی شخصیات سے بھی ملاقات کریں گے۔
تفصیلات کے مطابق وزیراعظم نوازشریف بوسنیا کے وزیراعظم ڈاکٹر ڈینس زویدے وچ کی دعوت پر 3 روزہ سرکاری دورے پر بوسنیا ہرزے گوینا پہنچ گئے۔
اس موقع پر ان کی اہلیہ کلثوم نوازکے علاوہ ایک اعلیٰ سطح وفد بھی ان کے ہمراہ ہے۔ وزیراعظم نوازشریف بوسنیا ہرزے گوینا کے ہم منصب کی دعوت پر گئے ہیں، تین روزہ سرکاری دورے میں وہاں کی پارلیمانی اسمبلی کے ارکان اوردیگر سیاسی قیادت سے ملاقاتیں بھی کریں گے۔
وزیراعظم نواز شریف دورہ بوسنیا ہرزے گوینا میں بزنس فورم سے خطاب کے علاوہ چیمبر اور سرمایہ کاروں کی مختلف تنظیموں کے اراکین سے بھی ملاقاتیں کریں گے۔
وزیراعظم کے دورہ بوسنیا کے دوران دونوں ملکوں کے درمیان دو طرفہ تعلقات، تجارت اور معیشت سمیت مختلف شعبوں میں تعاون کا جائزہ لیا جائے گا۔