پولیس نے جعلی مصالحہ بنانے والے گروہ کے تین ارکان کو گرفتار کرلیا، ملزمان کے قبضے سے 15 ٹن ملاوٹ شدہ مصالحہ بھی برآمد ہوا ہے۔
غیرملکی میڈیا رپورٹس کے مطابق دہلی پولیس کی کرائم برانچ نے کراول نگر کے علاقے میں چھاپہ مارا اور جعلی مصالحہ بنانے والے بھارتی گروہ کے تین ارکان کو حراست میں لے لیا ہے۔
پولیس نے تینوں ملزمان کے قبضے سے 15 ٹن ملاوٹ شدہ مصالحہ کے ساتھ خام مال بھی برآمد کیا ہے۔ ان مصالحوں میں پسا ہوا دھنیا، ہلدی، خشک آم کا پاؤڈر اور خشک سرخ مرچیں شامل ہیں۔
ملزمان کی شناخت 46 سالہ دلیپ سنگھ عرف بنٹی، 32 سالہ سرفراز اور 42 سالہ سپلائر خورشید ملک کے طور پر ہوئی ہے۔
پولیس نے بتایا کہ دہلی کے مشرقی علاقے میں کچھ مینوفیکچررز مختلف برانڈز کے نام پر ملاوٹ شدہ مصالحے بنا رہے ہیں جبکہ انھیں دہلی کی مارکیٹوں میں فروخت کیا جارہا ہے۔
ڈپٹی کمشنر پولیس راکیش پواریا نے بتایا کہ جعلی مصالحوں کا سراغ لگانے کے لیے یکم مئی کو سائبر سیل، کرائم برانچ کی ایک ٹیم کو تعینات کیا گیا تھا۔ بعدازاں انکشاف ہوا کہ کراول نگر علاقہ میں جعلی مصالحہ بنانے والے دو گروہ سرگرم ہیں۔
دلیپ سنگھ نے پولیس کو بتایا کہ وہ جعلی مصالحے بنانے والے یونٹ کا مالک ہے جبکہ خورشید کا کہنا تھا کہ وہ ان ملاوٹ شدہ مصالحوں کا سپلائر ہے۔
پولیس نے بتایا کہ اسی علاقے میں ایک اور یونٹ بھی کام کر رہا تھا جہاں سے سرفراز نامی شخص کو ملاوٹ شدہ مصالحہ بناتے ہوئے گرفتار کیا گیا۔
