پاکستان تحریک انصاف کے سیکریٹری جنرل عمر ایوب کی جانب سے شیر افضل مروت کے حالیہ بیان پر ردعمل دیا گیا ہے۔
تفصیلات کے مطابق سیکرٹری جنرل پی ٹی آئی عمرایوب کا کہنا تھا کہ بانی پی ٹی آئی ہمارے لیڈر ہیں، وہ کہیں گے تو استعفیٰ بھی دے دینگے۔ میری شیر افضل مروت سے کوئی لڑائی نہیں ہے، شیر افضل مروت کا نام میں نے ہی دیا تھا۔
عمرایوب نے کہا کہ بانی پی ٹی آئی تک میری رسائی نہیں ہے، جو ساتھی بانی سے ملنے جارہے ہیں وہ ضرور پوچھیں کہ ان کا نام کیوں واپس لیا۔
واضح رہے کہ اڈیالہ جیل کے باہر میڈیا سے گفتگو میں شیر افضل مروت نے کہا تھا کہ شبلی فراز اور عمرایوب نے آج بھی بانی پی ٹی آئی سے ملاقات ہونے نہیں دی۔
انھوں نے بتایا کہ دونوں رہنماؤں نے پارٹی سے کہا کہ اگر مجھے پبلک اکاؤنٹس کمیٹی (پی اے سی) کی چیئرمین شپ دی گئی تو ہمیں قبول نہیں۔
شیر افضل مروت کا کہنا تھا کہ پی ٹی آئی کو میں نے اس وقت اٹھایا جب یہ سب لوگ چھپے ہوئے تھے اور پارٹی مردہ گھوڑا بن گئی تھی، خدمت کا صلہ یہ ملا کہ سوشل میڈیا ٹیم میرے خلاف مہم چلا رہی ہے۔
پی ٹی آئی رہنما نے کہا کہ میرے بھائی کو ڈی نوٹیفائی کرنے کا مطلب تذلیل کرنا تھا، بطور احتجاج ان کے ساتھ کام کرنے سے انکار کرتا ہوں۔
