کراچی: کراچی کے علاقے گلشن بونیر میں ایس ایس پی راؤ انوار کی سربراہی میں جاری پولیس مقابلے میں 3 دہشت گرد ہلاک ہو گئے ہیں۔
تفصیلات کے مطابق کراچی کے علاقے گلشن ِ بونیر میں دہشت گردوں کی موجودگی کی خفیہ اطلاع پر ایس ایس پی ملیر راؤ انوار کی سربراہ میں پولیس کی بھاری نفری نے علاقہ کا گھیراؤ کر کے سرچ آپریشن شروع کردیا، جس پر علاقے میں موجود دہشت گردوں نے پولیس پر فائرنگ کردی۔
اس موقع پر پولیس نے مورچہ بند ہو کر دہشت گردوں سے مقابلہ کیا،دو طرفہ مقابلے کے نتیجے میں تین دہشت گرد ہلاک ہو گئے،ہلاک ہونے والے ایک دہشت گرد کی شناخت کمانڈر ریاض کے نام سے ہوگئی ہے، کمانڈر ریاض القاعدہ برصغیر کا اہم کمانڈر تھا۔
ایس ایس پی ملیر کے مطابق کمانڈر ریاض اپنے ساتھیوں کے ہمراہ پولیس ہیڈ کوارٹر پر حملہ کا منصوبہ بنالیا تھا،جس کے لیے دہشت گردوں کی ٹیم نے پولیس اسٹیشن اورسیکیورٹی اداروں کے دفاتر کی ریکی بھی کر لی تھی کہ پولیس کو اطلاع مل گئی جس پر فوری کارروائی کرتے ہوئے دہشت گردوں کو مقابلے کے بعد ہلاک کردیا گیا۔
ایس ایس پی راؤ انوار کے مطابق ہلاک ہونے والے تینوں دہشت گرد پولیس، سیکیورٹی اداروں اور فرقہ وارانہ ٹارگٹ کلنگ کے واقعات میں ملوث تھے۔
