وزیر اعلیٰ خیبرپختونخوا علی امین گنڈا پور نے کہا کہ مجھے علم ہے کہ مذاکرات کس سے کرنے ہیں اور کس کے ہاتھ میں حکومت ہے۔
نجی ٹی وی سے گفتگو کرتے ہوئے وزیر اعلیٰ کے پی علی امین گنڈا پور نے کہا کہ بانی پی ٹی آئی کہہ چکے ڈیل نہیں پاکستان کے لیے مذاکرات کے لیے تیار ہیں، بانی پی ٹی آئی کا شروع سے مؤقف رہا ہے کہ پاکستان کے لیے مذاکرات کے لیے تیار ہوں۔
انہوں نے کہا کہ بات چیت جب شروع کریں گے تو بانی پی ٹی آئی سے ہدایت لوں گا۔
علی امین گنڈا پور نے کہا کہ پارٹی کاز کو جو نقصان پہنچا رہے ہیں ان کو نہیں چھوڑیں گے، اشاروں سے چلنے والوں سے مذاکرات میں کوئی فائدہ نہیں۔
وزیر اعلیٰ کے پی نے کہا کہ بات چیت میں پہلی چیز آئین اور پھر قانون کی بالادستی ہوگی۔
گزشتہ دنوں ان کا کہنا تھا کہ خیبر پختونخوا صوبہ ہمیشہ سے قربانیاں دیتا رہا ہے جس کی وجہ کچھ اضلاع بہت تعلیم، صحت اور روزگار کی صورت میں پیچھے رہ گئے ہیں، ہمیں ان اضلاع کے لوگوں کو آگے لے کر آنا ہے۔
وزیر اعلیٰ کے پی نے کہا تھا کہ ہمارا بہت بڑا مسئلہ قانون کی حکمرانی ہے، جس کے ساتھ ناانصافی ہو رہی ہوگی ہم اس کا ساتھ دیں گے، ہمارے صوبے کا حق ہمیں ملنا چاہیے اور میں حق لے کر رہوں گا۔
ان کا کہنا تھا کہ صوبے کو حق دیے بغیر آرام سے حکومت کرنے کا مت سوچیں کیونکہ عوام کا حق لینے کیلیے پوری عوام کو لے کر نکلوں گا، مجھے اس کیلیے کوئی بھی قربانی دینی پڑی اس کیلیے تیار ہوں۔
