سالوں بعد بڑے اسکرین پر واپس آنے والے فردین خان نے انکشاف کیا کہ سنجے لیلا بھنسالی نے 2000 کی دہائی میں ان کے ساتھ کام کرنے سے انکار کر دیا تھا۔
14 سال بعد ویب سیریز ہیرا منڈی سے اسکرین پر واپس آنے والے اداکار فردین خان نے اپنے ایک انٹرویو میں انکشاف کیا اور بتایا کہ سنجے سے 2000 کی دہائی میں کام کے لیے رابطہ کیا تھا، لیکن فلمساز کو لگا کہ مجھ میں کام کرنے کی صلاحیت نہیں ہے۔
اداکار نے کہا کہ میں جب ہیرامنڈی میں اپنے کردار ولی محمد کے لیے سنجے سے ملنے گیا تو میں نے سنجے کو بتایا کہ 2000 کی دہائی کے اوائل میں کام کی تلاش میں ان کے دفتر گیا تھا، اور وہاں دس پندرہ منٹ بات چیت کی تھی۔
فردین خان کی 14 سال بعد اسکرین پر واپسی؛ ’ہیرا منڈی‘ کے مزید 4 کرداروں کا اعلان
فردین خان نے کہا کہ اس وقت سنجے لیلا بھنسالی نے مجھے جواب دیا کہ ’فردین مجھے نہیں لگتا کہ ہم اس وقت ساتھ کام کر سکتے ہیں کیونکہ مجھے تمہارے اندر وہ آگ نظر نہیں آتی، ’اس وقت مجھے بہت برا محسوس ہوا تھا‘۔
فردین خان نے کہا کہ اس وقت کام میں بہتری لانے کے لیے مجھے وہ سننے کی ہی ضرورت تھی، لیکن میں اپنی زندگی میں ہمیشہ انکا شکر گزار رہوں گا۔
واضح رہے کہ بھارتی اداکار فردین خان ایک دہائی بعد اب فلمساز سنجے لیلا بھنسالی کی نیٹ فلکس سیریز ہیرامنڈی دی ڈائمنڈ بازار سے ہی اداکاری کی دنیا میں واپس آرہے ہیں۔
سیریز ہیرا منڈی میں منیشا کوئرالہ، سوناکشی سنہا، ادیتی راؤ حیدری، ریچا چڈھا، سنجیدہ شیخ اور شرمین سیگل نے مرکزی کردار ادا کیے ہیں، فردین خان اس سیریز میں طحہ شاہ، شیکھر سمن اور ادھیان سمن کے ساتھ بھی نظر آئیں گے۔
