اسلام آباد: جج مخالف سوشل میڈیا مہم پر اسلام آباد ہائیکورٹ نے توہین عدالت کارروائی کا فیصلہ کرلیا۔
اے آر وائی نیوز کے مطابق ہائیکورٹ ذرائع کا بتانا ہے کہ جسٹس بابر ستار سے متعلق منفی مہم پر توہین عدالت کی کارروائی عمل میں لائی جائے گی۔
ذرائع نے کہا کہ جسٹس بابر ستار کے خط کو توہین عدالت کیس میں تبدیل کرنے کا فیصلہ کیا جس کی سماعت کے لیے کل بنچ تشکیل دیے جانے کا امکان ہے۔
جسٹس بابر ستار نے سوشل میڈیا مہم پر چیف جسٹس عامر فاروق کو خط لکھا تھا۔
ماہر قانون شہباز کھوسہ کا کہنا ہے کہ ہائیکورٹ کا فیصلہ خوش آئند ہے، عدالت کے پاس اختیارات ہیں جس کے مطابق کارروائی کا فیصلہ کیا گیا ہے۔
شہباز کھوسہ نے کہا کہ سپریم کورٹ کی جانب سے تمام ہائیکورٹ سے بھی رائے مانگی گئی تھی، پیمرا، ایف آئی اے ونگ سے اپ لوڈ میٹریل سے متعلق پوچھا جائے گا۔
ان کا کہنا تھا کہ میٹریل کہاں سے اپ لوڈ ہوا، ایف آئی اے ونگ ٹریس کرسکتا ہے، ججز کی ذاتی زندگی کے بارے میں پروپیگنڈا کیا گیا جو انتہائی غلط تھا۔
