اسلام آباد : ترجمان دفتر خارجہ نے واضح کیا کہ پاکستان کسی غیرملکی حکومت یاملٹری کواڈے فراہم نہیں کرے گا۔
تفصیلات کے مطابق ترجمان دفتر خارجہ ممتاز زہرا بلوچ نے ہفتہ وار میڈیا بریفنگ دیتے ہوئے کہا کہ ڈپٹی وزیراعظم و وزیر خارجہ اس وقت گیمبیا کے دورے پر ہیں، جہاں وہ کشمیر میں بھارتی مظالم،اسلامو فوبیا اور غزہ کی صورتحال پر بات کریں گے۔
ترجمان دفتر خارجہ نے اپوزیشن لیڈر کے اڈے فراہم کرنے کے بیان پر سوال کا جواب دیتے ہوئے واضح کیا کہ
پاکستان کسی غیرملکی حکومت یاملٹری کواڈے فراہم نہیں کرےگا، اپوزیشن لیڈر کےاڈے فراہم کرنے کے بیان پر ان سے ہی پوچھا جائے۔
انھوں نے بتایا کہ امریکی وفد نے حال ہی میں پاکستان کا دورہ کیا، دونوں ممالک کے درمیان تجارت،سرمایہ کاری سمیت دیگر ایشوز پر بات چیت ہوئی، پاکستان امریکہ کے ساتھ تعاون بڑھانے کے لیے بات چیت جاری رکھے
گا۔
غزہ کی صورتحال کے حوالے سے ممتاز زہرا بلوچ کا کہنا تھا کہ پاکستان غزہ میں اسرائیل کے غیر انسانی اقدامات کی مذمت کرتا ہے، اسرائیل لیڈرز کے رفع پر حملہ کے بیانات تشویشناک ہیں، عالمی برادری اسرائیل کو مظالم سے روکے اور غزہ کا محاصرہ ختم کروائے۔
مقبوضہ کشمیر سے متعلق ترجمان نے کہا کہ بھارتی غیر قانونی مقبوضہ کشمیر میں حالیہ سیلاب سے متاثرہ لوگوں کے ساتھ ہمدردی کا اظہار کرتے ہیں اور پاکستان کشمیریوں کی املاک چھیننے کے بھارتی عمل کی شدید مذمت کرتا ہے۔
ترجمان نے شہزاد اکبر کے الزامات مسترد کرتے ہوئے کہا کہ اپنے شہریوں کو نشانہ بنانا ہماری پالیسی نہیں، ان کے الزامات بے بنیاد اور سیاسی ہیں جبکہ دعوے بھی غلط ہیں۔
دفتر خارجہ کی ترجمان کا کہنا تھا کہ ہم نے بھارت میں منشیات اسمگلنگ میں پاکستانیوں کی گرفتاری کی رپورٹس دیکھی ہیں، ہم اس حوالے سے تفصیلات موصول ہونے کا انتظار کر رہے ہیں، تفصیلات موصول ہونے پر اپنا ردعمل دیں گے۔
ان کا مزید کہنا تھا کہ پاکستان نے ہمیشہ کہا ہے. کہ ایل او سی پر امن ہونا چاہیے اور ہم بھارت پر زور دیتے ہیں کہ وہ اشتعال بڑھانے والے اقدامات سے گریز کرے۔
