گوادر میں 27 اور 28 فروری کو ہونے والی شدید بارشوں کے باعث سیلاب کے بعد پاک فوج کا ریسکیو اور ریلیف آپریشن جاری ہے۔
اے آر وائی نیوز کے مطابق پاک فوج کے دستے بچاؤ اور امدادی کارروائیوں کے لئے متحرک ہیں، جنرل آفیسر کمانڈنگ 44 ڈویژن نے کمشنر مکران ڈویژن اور ڈپٹی کمشنر گوادر کے ہمراہ گوادر سٹی اور سربندر کا تفصیلی دورہ کیا۔
اس موقع پر انہوں نے آرمی اور سویلین انتظامیہ کی امدادی سرگرمیوں کا جائزہ لیا اور مقامی آبادی کو فوج کے ہر ممکن تعاون کا یقین دلایا۔
اس وقت پاک فوج کے جوان گوادر، جیونی اور سوربندر کے گرد و نواح میں امدادی کارروائیوں میں مصروف ہیں، گاؤں روہبر، پرنٹوک اور خرگوشکی کے پھنسے ہوئے دیہاتیوں کو محفوظ مقام پر پہنچا دیا گیا۔
سیلاب زدہ علاقوں اور گھروں سے پانی نکالنے کے لیے فوج نے سکشن پمپ لگائے ہیں، بے گھر پریشان شہریوں میں پکا ہوا کھانا اور خشک راشن تقسیم کیا جا رہا ہے۔
طوفانی بارشوں سے تباہی، گوادر کو آفت زدہ قرار دینے کا مطالبہ
بے گھر آبادی کو خیمے اور چٹائیاں بھی فراہم کی جا رہی ہیں جبکہ مقامی آبادی کی جانب سے پاک فوج کی کوششوں کوسراہا جارہا ہے۔
