راولپنڈی : پاکستان اور بھارت کے ڈی جی ایم اوز میں کنٹرول لائن پر سیز فائر کی خلاف ورزیوں اور دیگر معاملات کے حوالے سے ہاٹ لائن رابطہ ہوا ہے۔
پاک فوج کے شعبہ برائے تعلقات عامہ (آئی ایس پی آر ) کے مطابق پاک بھارت ڈی جی ایم اوز کے درمیان ہاٹ لائن پر رابطہ ہوا ہے، جس میں پاکستانی ڈی جی ایم او نے لائن آف کنٹرول پر بھارتی فوج کی جانب سے مسلسل اشتعال انگیزیوں کا معاملہ اٹھایا۔
پاکستانی ڈی جی ایم او میجرجنرل ساحر شمشاد مرزا کا کہنا تھا کہ بھارت جان بوجھ کر نہتے شہریوں کو نشانہ بنارہا ہے، رواں سال بھارت نے219شہریوں کو نشانہ بنایا۔
ڈی جی ایم او کا کہناتھا کہ بھارت کی غیرپیشہ ورانہ،غیراخلاقی کارروائیاں اشتعال انگیز اور امن کے لئے تباہ کن ہیں، بھارت ایل او سی اور ورکنگ باؤنڈری پر دراندازی کا پروپیگنڈہ کررہا ہے، بھارتی غیراخلاقی اقدامات اشتعال انگیزی پھیلارہے ہیں۔
مزید پڑھیں: لائن آف کنٹرول، بھارتی فوج کی دراندازی، تین خواتین سمیت 5 افراد زخمی
ڈی جی ایم او نے کہا کہ بھارتی اشتعال انگیزیوں سے امن کو شدید خطرات لاحق ہو رہے ہیں، بھارتی سیکیورٹی فورسز پاکستان پر الزام تراشیوں سے گریز کریں اور ایل اوسی، ورکنگ باؤنڈری پر اشتعال انگیزی فوری طور پر بند کرے۔
واضح رہے کہ لائن آف کنٹرول پر بھارتی فوج کی جانب سے دراندازی اور سیز فائر کی مسلسل خلاف ورززی کی جارہی ہے، گزشتہ دنوں بھی کھوئی رٹہ سیکٹر پر بلااشتعال فائرنگ کی گئی جس کے نتیجے میں تین خواتین سمیت پانچ افراد زخمی ہوگئے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
