سعودی نائب وزیر سرمایہ کاری کی قیادت میں سرمایہ کاروں کا وفد آج پاکستان پہنچے گا بڑے معاہدوں کا امکان ہے۔
اے آر وائی نیوز کے مطابق سعودی نائب وزیر سرمایہ کاری کی قیادت میں سرمایہ کاروں کا وفد آج پاکستان پہنچے گا۔ وفد میں سعودی عرب کی کاروباری، تجارتی اور سرمایہ کار شخصیات شامل ہیں۔
سعودی عرب کا یہ اعلیٰ سطح کا وفد دو روز ملک میں قیام کرے گا۔ وفد 40 سے 50 افراد پر مشتمل ہے جو سعودی فرماں رواں اور وزیراعطم محمد بن سلمان کی ہدایت پرپاکستان کا دورہ کر رہا ہے۔ اس وفد میں 30 سے زائد کمپنیوں کے سی ای اوز بھی شامل ہوں گے۔
وفد پاکستان میں تجارت و سرمایہ کاری کے نئے مواقع کا جائزہ لے گا اور تجارتی تعلقات کے فروغ کیلیے مختلف شعبوں میں تجارتی وفود کا تبادلہ ہو گا۔
اس دورے کے دوران زراعت اور صنعت کے منصوبوں میں سرمایہ کاری پرپ اکستانی حکام اور تاجروں سے بات ہوگی۔ سعودی وفد پاکستان میں سرمایہ کاری کے مواقعوں پرمذاکرات کرے گا اور وطن واپسی پر ولی عہد محمد بن سلمان کو دورے اور سرمایہ کاری پر بریفنگ دے گا۔
پاکستان کا دورہ کرنے والے وفد میں آئی ٹی، میرین، مائننگ، تیل و گیس کی تلاش، دوا سازی، ایوی ایشن، فنانس، زراعت، ٹیلی کمیونی کیشن، تعمیرات، لاجسٹک سروسز، پراپرٹی ڈیولپرز، ریٹیلرز اور دیگر کمپنیوں کے سربراہان بھی شامل ہوں گے۔
جنگی بنیادوں پر پاکستان میں سرمایہ کاری پر کام شروع کر دیا، سعودی عرب
حکومتی ذرائع کا کہنا ہے کہ اس دورے کے دوران سعودی عرب کی پاکستان میں 10 ارب ڈالر تک سرمایہ کاری کے معاہدوں اور ایم او یوز پر دستخط ہونے کا امکان ہے۔
