بھارت کے لوک سبھا الیکشن کے لیے ایک حلقے میں دلچسپ صورتحال پیدا ہو گئی ہے کیونکہ وہاں بی جے پی کے امیدوار کے مدمقابل کوئی اور نہیں خود اس کی بیوی آ گئی ہے۔
بھارتی میڈیا کے مطابق لوک سبھا کے انتخابات میں ریاست اترپردیش کی ایٹاوہ سے نشست پر دلچسپ صورتحال پیدا ہوگئی ہے۔ اس نشست پر بی جے پی کی جانب سے موجودہ رکن پارلیمنٹ رام شنکر کٹھیریا ہیں لیکن ان کا مقابلہ کسی اور سے نہیں بلکہ اپنی بیوی سے ہے کیونکہ ان کی بیوی مردولا کٹھیریا نے اپنے شوہر کے خلاف آزاد امیدوار کی حیثیت سے کاغذات نامزدگی جمع کرا دیے ہیں۔
رام شنکر کٹھیریا جو مودی حکومت میں مرکزی وزیر بھی رہ چکے ہیں اور تیسری مرتبہ بی جے پی کے امیدوار کے طور پر میدان میں اتر رہے ہیں۔ انہیں حیرت کا شدید جھٹکا اس وقت لگا جب ان کے کاغذات نامزدگی جمع کرانے کے بعد اسی حلقے سے کسی اور نے نہیں بلکہ ان کی بیوی مردولا نے آزاد امیدوار کی حیثیت سے اپنے کاغذات نامزدگی جمع کرائے۔اس موقع پر مردولا کٹھیریا نے کہا کہمیں اسی لیے اپنے شوہر کے خلاف الیکشن لڑ رہی ہوں کہ ہمارے ملک میں جمہوریت ہے اور یہاں ہر کوئی آزاد ہے اور کسی کے خلاف بھی الیکشن لڑ سکتا ہے۔
جب ان سے صحافیوں نے سوال کیا کہ کیا ماضی کی طرح وہ اس بار بھی اپنے شوہر کے خلاف کاغذات نامزدگی واپس لے لیں گی تو مردولا کا کہنا تھا کہ اس بار انہوں نے میدان چھوڑنے کے لیے کاغذات جمع نہیں کرائے بلکہ وہ میدان میں کھل کر مقابلہ کریں گی۔
واضح رہے کہ اس سے قبل مردولا کٹھیریا نے 2019 کے انتخابات میں اپنے شوہر کے مدمقابل کاغذات نامزدگی جمع کرائے تھے تاہم بعد ازاں انہوں نے واپس لے لیے تھے۔
