اسلام آباد: پاکستان نے امریکی محکمہ خارجہ کی انسانی حقوق سے متعلق رپورٹ مسترد کردی۔
اے آر وائی نیوز کے مطابق ترجمان دفتر خارجہ ممتاز زہرا بلوچ کا کہنا ہے کہ امریکی محکمہ خارجہ کی رپورٹ کے مندرجات غیرمنصفانہ، غلط معلومات پر مبنی اور زمینی حقائق سے ہٹ کر ہیں۔
دفتر خارجہ کا کہنا ہے کہا انسانی حقوق 2023 کنٹری رپورٹ کو واضح طور پر مسترد کرتے ہیں، امریکی رپورٹس کی تیاری کی سالانہ مشقوں میں معروضیت کا فقدان ہے، رپورٹ پھرعالمی ایجنڈے کی معروضیت کی کمی اورسیاست کی وجہ سے نمایاں ہے۔
ممتاز زہرا بلوچ نے کہا کہ یہ رپورٹس واضح طورپردہرے معیار کو ظاہر کرتی ہیں، اس میں غزہ اورمقبوضہ کشمیر کی صورت حال کو نظرانداز یا کم کیا گیا ہے۔ کیا رپورٹ میں غزہ کی تشویشناک صورت حال کو نظرانداز کیا جاسکتا ہے؟ کیا رپورٹ میں غزہ میں شہریوں کے قتل عام کو نظرانداز کیا جاسکتا ہے۔
ترجمان دفتر خارجہ نے کہا کہ غزہ میں نسل کشی پرامریکا کی خاموشی نام نہاد رپورٹس میں بیان مقاصد کیخلاف ہے، پاکستان عالمی انسانی حقوق کے ایجنڈے کو فروغ دینے کیلئے ثابت قدم ہے، پاکستان معروضیت کو برقرار رکھنے کے لیے اپنے عزم پرثابت قدم ہے۔
دفتر خارجہ کا کہنا ہے کہ امریکی محکمہ خارجہ پیچیدہ مسائل کاجائزہ لیتے وقت مستعدی سےکام لے، رپورٹس کو حتمی شکیل دینے میں معروضیت کا مظاہرہ کرے۔
ترجمان دفتر خارجہ کا کہنا ہے کہ امریکی محکمہ خارجہ رپورٹس غیرجانبداری اور ذمہ داری کا مظاہرہ کرے، سچ بولنے کے لیے اخلاقی جرأت کا مظاہرہ کرنا چاہیے۔
