اسلام آباد : وزیراعظم شہباز شریف سے اٹارنی جنرل منصورعثمان نے اہم ملاقات کی ، ملاقات میں وزیر اعظم کو جاری انتخابات التوا کیس کے حوالے سے بریف کیا گیا اور مشاورت ہوئی۔
تفصیلات کے مطابق وزیراعظم شہباز شریف نے اٹارنی جنرل منصورعثمان کو طلب کیا ، جس پروہ سپریم کورٹ سے وزیراعظم ہاؤس پہنچے۔
سپریم کورٹ میں انتخابات التوا کیس کی سماعت سے پہلے اٹارنی جنرل منصورعثمان کی وزیراعظم سے اہم ملاقات ہوئی، وزیر قانون اعظم نذیر تارڑ بھی وہیں موجود تھے۔
ملاقات میں وزیر اعظم کو جاری کیس کے حوالے سے بریف کیا گیا اور مشاورت ہوئی، ذرائع کے مطابق وفاقی حکومت کے اعلیٰ سطح وفد کی آج سپریم کورٹ میں پیشی کا امکان ہے۔
حکومتی اتحاد نے الیکشن ملتوی کیس میں فریق بننے کا فیصلہ کیا ہے، ن لیگ، پیپلز پارٹی اور جے یوآئی کے وزرا وفد کا حصہ ہوں گے۔
دوسری جانب پنجاب اور کے پی انتخابات کی تاریخ ملتوی کرنے کیخلاف درخواست کے معاملے پر ن لیگ، پیپلز پارٹی اور جے یوآئی ف نے پارٹی بننے کی متفرق درخواست دائر کی۔
سپریم کورٹ رجسٹرارآفس نےمتفرق درخواست اجازت کےبعدوصول کرلی ، اس سےقبل رجسٹرارسپریم کورٹ آفس نےمتفرق درخواست لینے سے انکار کیا تھا۔
گذشتہ روز چیف جسٹس نےانتخابات کے لیے ججوں کی تنخواہوں میں کٹوتی کی تجویز دی تھی ، چیف جسٹس نےکہا تھا کہ الیکشن کمیشن کا فیصلہ جلدی بازی میں لکھا گیا، الیکشن کمیشن کےپاس الیکشن تاریخ میں توسیع کی کوئی اتھارٹی یا قانون نہیں۔
بعد ازاں حکومت نے عدالتی اصلاحات کے لیے فوری قانون سازی کا فیصلہ کیا تھا ، جس کے بعد چیف جسٹس آف پاکستان ازخود نوٹس کا اختیار تنہا استعمال نہیں کر سکیں گے۔