کراچی : ورلڈ کپ دو ہزار پندرہ کی ٹرافی لاہور میں ایک دن سیر کرنے کے بعد کراچی پہنچ گئی ہے، ٹرافی کی نمائش کیلئے نیشنل اسٹیڈیم میں تقریب کا اہتمام کیا گیا، جس میں شاہد آفریدی سمیت کئی کھلاڑیوں نے شرکت کی۔
ورلڈ کپ دوہزار پندرہ کا عالمی چیمپیئن کون ہوگا اس کا فیصلہ ہونے پانچ ماہ باقی ہیں لیکن عالمی ٹرافی مختلف ممالک کا دورہ کرنے کے بعد اب پاکستان پہنچ چکی ہے۔
گزشتہ روز لاہور میں رہنے کے بعد ورلڈ کپ کی ٹرافی کراچی منتقل کردی گئی ہے، نیشنل اسٹیڈیم کراچی میں ایک تقریب کے دوران ٹرافی نمائش کیلئے پیش کی گئی ہے، شاہد آفریدی، سرفراز احمد، فواد عالم ، اسد شفیق سمیت دیگر کرکٹرز اور پی سی بی کے آفیشلز نے تقریب میں شرکت کی۔
ورلڈ کپ کی ٹرافی جمعرات کو ایک مقامی اسکول اور کالج میں نمائش کیلئے پیش کی جائیگی، جسکے بعد قائد اعظم کے مزار پر شائقین کرکٹ کو بھی ٹرافی قریب سے دیکھنے کا موقع ملے گا۔ مزارِ قائد پر پاکستانی ٹیم کے کھلاڑیوں کیساتھ فوٹو سیشن بھی رکھا گیا ہے۔
