دبئی: متحدہ عرب امارات پہنچنے والے ایشیائی باشندے نے 13 ہزار فٹ کی بلندی سے اسکائی ڈائیونگ کر کے سب کو حیران کردیا۔
خلیج ٹائمز کی رپورٹ کے مطابق سوشیل کمار کی عمر 84 ہے اور انہیں مختلف ایڈونچرز کا شوق ہے، انہوں نے اپنی زندگی میں پہلی بار اسکائی ڈائیونگ کا فیصلہ کیا اور اس خواہش کو دبئی میں پایہ تکمیل تک پہنچایا۔
سوشیل کمار نے زمین سے تیرہ ہزار فٹ کی بلندی سے جہاز سے چھلانگ لگائی اس دوران اُن کے ساتھ ماہر پیرا گلائیڈر بھی موجود تھا۔ اپنے مشن پر جانے سے قبل گفتگو کرتے ہوئے بھارتی شہری کا کہنا تھا کہ ’’میرا یقین ہے کہ زندگی کا اصل مطلب دولت کمانا نہیں بلکہ مختلف تجربات کرنا ہے تاکہ انسان لطف اندوز ہوسکے‘‘۔
اُن کا کہنا تھا کہ ’’میں بنگلور سے اپنی خواہش پوری کرنے فیملی کے ساتھ دبئی پہنچا، جب اپنے مشن کے حوالے سے اہل خانہ کو آگاہ کیا تو انہوں نے عمر کی وجہ سے اسے ناممکن قرار دیا مگر میرے نزدیک کسی بھی کام کو کرنے کے لیے عمر زیادہ یا کم ہونا مسئلہ نہیں ہے‘‘۔
دبئی اسکائی ڈائیونگ کی جانب سے بزرگ شخص کی ویڈیو شیئر کی گئی جس میں دیکھا جاسکتا ہے کہ وہ پام جمیرا کے قریب فضاء میں اڑ رہے ہیں۔
