لاہور: متحدہ عرب امارات میں کھیلے جانے والے ایشیا کپ میں شرکت کے لیے قومی کرکٹ ٹیم سرفراز احمد کی قیادت میں دبئی روانہ ہوگئی۔
تفصیلات کے مطابق قومی ٹیم غیرملکی ایئرلائن کی پروازای کے 623 سے دبئی روانہ ہوئی، ٹیم نے ایونٹ میں اچھا پرفارم کرنے کے عزم کا اظہار کیا۔
ایشیاکپ 15 سے 28 ستمبر تک متحدہ عرب امارات میں کھیلا جائے گا، ایشیا کپ کرکٹ ٹورنامنٹ میں 6 ٹیمیں حصہ لیں گی، ایونٹ میں پاکستان اور بھارت کا میچ 19 ستمبر کو کھیلا جائے گا۔
خیال رہے کہ ایشیا کپ کی سنہری ٹرافی کی رونمائی گذشتہ دنوں یو اے ای میں ہوئی، چھ ٹیمیوں کے درمیان اس ٹرافی کے حصول کے لیے جنگ ہوگی۔
ایشیاکپ 2018: چمچماتی ٹرافی کی یو اے ای میں رونمائی
خیال رہے کہ گزشتہ دنوں چیف سلیکٹر انضمام الحق نے ایشیا کپ کے لیے 16 رکنی قومی ٹیم کا اعلان کیا تھا۔
سولہ رکنی اسکواڈ میں کپتان سرفراز احمد، امام الحق، فخر زمان، شان مسعود، بابر اعظم، شعیب ملک، آصف علی، حارث سہیل، شاداب خان، محمد نواز، حسن علی، عثمان شنواری، محمد عامر، جنید خان، شاہین شاہ آفریدی اور فہیم اشرف شامل ہیں۔
واضح رہے کہ اب تک ایشین کپ کے چودہ ٹورنامینٹہوچکے ہیں، جن میں سے دو میں پاکستان نے فتح اپنے نام کی، سب سے زیادہ ٹورنامینٹ بھارت نے اپنے نام کیے۔
