واشنگٹن: امریکی صدر ڈونلڈ ٹرمپ نے عالمی مارکیٹ میں تیل کی قیمتوں میں کمی کے لیے تیل برآمد کرنے والے ممالک کی تنظیم اوپیک سے پیداوار بڑھانے کا مطالبہ کردیا۔
غیرملکی خبررساں ادارے کے مطابق امریکی صدر ڈونلڈ ٹرمپ نے اپنے ٹویٹ میں لکھا کہ اہم بات یہ ہے کہ اوپیک تیل کی پیداوار بڑھائے، عالمی مارکیٹ بے یقینی کی کیفیت سے دوچار ہے، تیل کی قیمتیں بڑھ رہی ہیں، آپ کا بہت شکریہ۔
امریکی صدر ٹرمپ کے ٹویٹ کے بعد امریکا میں خام تیل کے مستقبل کے سودوں کے لیے تیل کی قیمت میں ایک ڈالر فی بیرل تک کمی واقع ہوئی ہے اور مستقبل کے سودے 58.33 ڈالر فی بیرل میں ہوئے۔
Very important that OPEC increase the flow of Oil. World Markets are fragile, price of Oil getting too high. Thank you!
— Donald J. Trump (@realDonaldTrump) March 28, 2019
واضح رہے کہ رواں سال کے آغاز میں اوپیک کی جانب سے تیل کی پیداوار میں کٹوتی کے فیصلے کے بعد قیمتوں میں اضافہ ہوا ہے، اس کے علاوہ اوپیک کے دو رکن ممالک وینزویلا اور ایران پر امریکی پابندیوں کے نتیجے میں بھی عالمی مارکیٹ میں تیل کی قیمتوں میں اضافہ ریکارڈ کیا گیا۔
مزید پڑھیں: اوپیک کا 8سالوں میں پہلی مرتبہ تیل کی پیداوار میں کمی کا فیصلہ
تجزیہ کاروں کے مطابق اگر اقتصادی سرگرمیاں پورے زور و شور سے جاری رہتیں اور تیل کی کھپت میں اضافہ ہوتا تو عالمی مارکیٹ میں تیل کی قیمتیں اس سے بھی زیادہ ہوسکتی تھیں۔
یاد رہے کہ اوپیک، روس اور تیل پیدا کرنے والے دوسرے ممالک نے دسمبر میں عالمی مارکیٹ میں تیل کی قیمتوں میں استحکام کے لیے جنوری سے اپنی یومیہ پیداوار میں 12 لاکھ بیرل کی مجموعی طور پر کمی سے اتفاق کیا تھا۔
اوپیک کے حکام نے پیش گوئی کی ہے کہ 2019 میں تیل کی عالمی فی بیرل اوسط قیمت 60 سے 80 ڈالر کے درمیان رہے گی۔
