سرگودھا: پنجاب کے شہر سرگودھا میں خاتون کے ہاں بیک وقت 6 بچوں کی پیدائش ہوئی ہے۔
تفصیلات کے مطابق سرگودھا کے نجی اسپتال میں غزالہ نامی خاتون نے بیک وقت 6 بچوں کو جنم دیا ہے، نومولود بچوں میں 4 بیٹے اور 2 بیٹیاں شامل ہیں۔
اسپتال انتظامیہ کا کہنا ہے کہ خوش نصیب والدین کے ہاں 7 سال بعد پہلی اولاد ہوئی ہے، تمام بچے اور ان کی والدہ صحت مند ہیں۔
بچوں کی پیدائش کے بعد پورے اہل خاندان میں خوشی کی لہر دوڑ گئی اور خاندان کے لوگ ایک دوسرے کو مٹھائیاں کھلاتے اور مبارکباد دیتے رہے۔
اسپتال ذرائع کے مطابق سرگودھا میں بیک وقت چھ بچوں کی پیدائش کا پہلا واقعہ ہے اس سے قبل اسی اسپتال میں ایک خاتون نے ایک ہی وقت میں پانچ بچوں کو جنم دیا تھا۔
مزید پڑھیں: لاہور: شادی کے 4 سال بعد ایک ساتھ 4 بچوں کی پیدائش
واضح رہے کہ یکم ستمبر کو لاہور کے شہر ڈسکہ میں شادی کے چار سال بعد رہائشی علی رضا کے بیک وقت 4 بچوں کی پیدائش ہوئی تھی، پورا خاندان اس موقع پر خوشی سے جھوم اٹھا تھا۔
یاد رہے کہ رواں سال جون میں بھی لاہور میں نجی اسپتال میں خاتون کے ہاں 4 بچوں کی پیدائش ہوئی تھی۔
لاہور کے علاقے جلوموڑ کے رہائشی محمد قیصر کی اہلیہ نے 4 بچوں کو جنم دیا تھا، جن میں 2 لڑکیاں اور 2 لڑکے شامل ہیں۔
