نیویارک: فوٹو شیئرنگ ایپ انسٹاگرام کی سروس دنیا بھر میں اچانک بند ہوگئی جس کی وجہ سے صارفین کو شدید مشکلات کا سامنا ہے۔
غیرملکی خبررساں ادارے کی رپورٹ کے مطابق فیس بک کی زیر ملکیت فوٹو شیئرنگ ایپ انسٹاگرام بند ہوگئی، ایک ماہ میں یہ مسئلہ دوسری بار پیش آیا۔
صارفین کے مطابق انہیں انسٹاگرام پر تصاویر اور ویڈیوز شیئر کرتے ہوئے مشکلات کا سامنا ہے جبکہ پہلے سے کھلی ہوئی ونڈو بھی آگے نہیں بڑھ رہی۔
اطلاع کے مطابق فیس بک کی زیرملکیت دوسری ایپلیکشنز بدستور کام کررہی ہیں، انسٹاگرام کے ترجمان کی جانب سے سروس کی بندش پر تاحال کوئی وضاحت پیش نہیں کی گئی۔
یاد رہے کہ اس سے قبل 14 اپریل کو انٹرنیٹ کی مشہور ویب سائٹ فیس بک کے زیر ملکیت تمام ایپس کی سروس دنیا بھر میں اچانک بند ہوگئی تھی جس کے باعث صارفین کو شدید مشکلات کا سامنا کرنا پڑا۔
فیس بک کے ساتھ موبائل فون کی معروف پیغام رسانی کی اپیلیکیشن واٹس ایپ کی سروس بھی تکنیکی مسئلے کی وجہ سے متاثر ہوئی تھی جبکہ فوٹو شیئرنگ ایپ انسٹاگرام کے صارفین کو بھی شدید مشکلات کا سامنا کرنا پڑا تھا۔
