واشنگٹن: امریکی ریاست کیلی فورنیا میں چھوٹا طیارہ گھر پر گر کر تباہ ہوگیا جس کے نتیجے میں پائلٹ ہلاک ہوگیا۔
غیرملکی خبررساں ادارے کے مطابق امریکی ریاست کیلی فورنیا میں سنگل انجن طیارہ ایس آر 22 گھر پر گر کر تباہ ہوگیا جس کے نتیجے میں پائلٹ ہلاک ہوگیا۔
رپورٹ کے مطابق حادثے کے وقت باپ اپنے شیرخوار بچے کے ساتھ گھر پر موجود تھا جو معجزانہ طور پر محفوظ رہے۔
فائر فائٹرز نے جائے وقوعہ پر پہنچ کر طیارے میں لگی آگ پر قابو پایا اور امدادی کارروائیوں کے بعد طیارے کے ملبے کو ہٹادیا گیا ہے۔
Plane crashed into a home east of @FoothillBibleCh. Praying everyone is ok. #upland @FOXLA @NBCLA @CBSLA @ABC7 pic.twitter.com/RKAqATIXJc
— Micah James Lugg (@mijah) November 7, 2019
طیارے حادثے کی وجوہات کا فوری طور پر تعین نہیں ہوسکا ہے تاہم انکوائری کمیٹی تشکیل دے دی گئی ہے۔
عینی شاہد پادری مکاہ لاگ کا کہنا ہے کہ طیارہ فوتھل بائبل چرچ کی پارکنگ سے بالکل ہی نیچے آگیا تھا جس کی وجہ سے لوگ خوفزد ہوگئے تھے۔
مکاہ لاگ کا کہنا تھا کہ اس کے بعد ایک زور دار آواز سنائی دی، دھویں کے بادل اٹھتے ہوئے دکھائی دینے لگے، یہ سارا منظر ہمارے لیے بہت خوفناک تھا۔
واضح رہے کہ گزشتہ ماہ بھی ایک چھوٹا طیارہ شاپنگ سینٹر کی چھت پر گر کر تباہ ہوگیا تھا جس کے نتیجے میں پائلٹ ہلاک اور ایک مسافر زخمی ہوگیا تھا۔
