اوہائیو : امریکی صدر ڈونلڈ ٹرمپ نے کہا کہ میں نوبل امن انعام کا حق دار ہوں، آبے احمد نہیں ، میں نے ایک ملک کو بڑی جنگ سے بچایا ہے، گزشتہ سال اکتوبر میں ایتھوپیا کے وزیر اعظم آبے احمد کو امن کی کاوشوں کے اعتراف میں امن کا نوبل انعام دیا گیا۔
تفصیلات کے مطابق امریکی ریاست اوہائیو میں ایک مہم کے دوران اپنے حمایتوں سے خطاب کرتے ہوئے ڈونلڈ ٹرمپ نے کہا کہ میں آج آپ کو نوبل انعام کے بارے میں بتاتا ہوں، میں نے معاہدہ کرکے ایک ملک کو بڑی جنگ سے بچایا اور میں نے ابھی سنا ہے اس ملک کے سربراہ کونوبل انعام دیا جارہا ہے، مگر اس کا اصلی حقدار تو میں ہوں۔
اگرچہ امریکی صدر نے خطاب میں کسی ملک کا نام نہیں لیا لیکن یہ بات واضح ہے کہ ٹرمپ افریقی ملک ایتھوپیا کے وزیر اعظم آبے احمد کی بات کررہے ہیں۔
گذشتہ سال اکتوبر میں ایتھوپیا کے وزیر اعظم آبے احمد کو اریٹریا اور ایتھوپیا کے درمیان دہائیوں سے جاری خونی جنگ کے خاتمے کے لیے اہم کردار ادا کرنے اور امن کاوشوں کے اعتراف میں نوبل امن انعام کے حقدار ٹھہرایا گیا تھا۔
آبے احمد ایتھوپیا کی تاریخ کے اب تک کے کم عمر ترین وزیراعظم ہیں، حکومت مخالف مظاہروں کے کئی مہینوں کے بعد اپنے پیشرو کے مستعفیٰ ہونے پر اپریل 2018 میں انہوں نے وزارت عظمی کا عہدہ سنبھالا تھا۔
دلچسپ بات یہ ہے کہ آبے احمد کے 11 اکتوبر کو نوبل انعام ملنے کے اعلان کے بعد ٹرمپ نے انہیں مبارکباد تک نہیں دی تھی۔
