دبئی : اماراتی وزارت صحت نے اعلان کیا ہے کہ متحدہ عرب امارات کے تمام اسپتالوں میں کرونا وائر س کے مریضوں کا مفت علاج کیا جائے گا۔
تفصیلات کے مطابق کرونا وائرس نے پوری دنیا میں دہشت پھیلارکھی ہے، اماراتی وزارت صحت کی جانب سے متحدہ عرب امارات کے تمام اسپتالوں میں کرونا وائر س کے متاثرین کا مفت علاج کا اعلان کردیا ،اس سلسلے میں دُبئی ہیلتھ اتھارٹی نے تمام اسپتالوں کو ایک سرکلر بھی جاری کر دیا ہے۔
سرکلر کے مطابق مفت علاج کی یہ سہولت اُن تمام مریضوں کو میسر ہوگی ، جن میں کرونا وائرس کی تصدیق ہو گئی ہو ، یا اس موذی مرض میں مبتلا ہونے کا شُبہ ہو، مشتبہ مریضوں کے تمام ٹیسٹ مفت ہوں گے ۔
سرکلر میں کہا گیا ایسے افراد جنہوں نے اپنی میڈیکل انشورنس نہیں کروا رکھی ہےتو ان کو دی جانے والی علاج کی سہولت ہنگامی علاج کے زمرے میں شمار ہو گی اور ان کا تمام طبی مراکز اور اسپتالوں میں علاج مفت ہو گا۔
مزید پڑھیں : متحدہ عرب امارات: ایک ہی خاندان کے 4افراد میں کورونا وائرس کی تصدیق
سرکلر کے مطابق اگر کسی مریض کے پاس انشورنس کی سہولت ہے، تو انشورنس کمپنیوں کو علاج معالجے پر آنے والے اخراجات کی ادائیگی کرنا ہوگی۔
خیال رہے متحدہ عرب امارات میں اب تک کرونا وائرس کے 5 کیسز رپورٹ ہوچکے ہیں ، جن میں سے 4 افراد صحت یاب ہوئے جبکہ پانچویں مریض کا علاج جاری ہے۔
متحدہ عرب امارات میں مقیم شہریوں نے کرونا وائرس سے محفوظ رہنے کے لیے حفاظتی ماسک کا استعمال شروع کردیا ہے جبکہ کرونا وائرس کے حوالے سے ہوائی اڈوں پر بھی سکریننگ کے خصوصی انتظامات کیے گئے ہیں۔
