مکۃ المکرمہ کے گورنر نے مقدس شہر میں غیر مہذب میوزک ویڈیو ریلیز کرنے والی خاتون گلوکارہ کو گرفتار کرنے کا حکم دےد یا۔
بین الاقوامی میڈیا رپورٹس کے مطابق سعودی حکام نے خاتون کی جانب سے ریلیز کیے گئے گانے "بنت مکہ یا گرل فرام مکہ” کو مقدس شہر کے رسم و رواج اور معاشرتی روایت کے برخلاف اور توہین آمیز قرار دیا ہے۔
چند روز قبل یوٹیوب پر ایاسل سلے نامی سعودی خاتون نے مکہ میں تیار کیا گیا ایک ویڈیو سانگ اپنے چینل پر اپ لوڈ کیا تھا جس میں مقدس شہر کی خواتین کی تعریفیں کی گئی تھیں جب کی کیفے میں فلمائی گئی ویڈیو کے بیک گراؤنڈ میں مسکراتے ہوئے بچوں کے ساتھ ساتھ رقص بھی نظر آرہا تھا۔
ویڈیو وائرل ہونے پر حکام نے نوٹس لیا اور یوٹیوب سے گانے کو ڈیلیٹ کردیا گیا جب کہ گلوکارہ کو گرفتار کرنے کا حکم جاری کرتے ہوئے پروڈکشن ٹیم کو بھی شامل تفتیش کرنے کی ہدایت کی گئی۔
مکہ کے پرنس خالد بن فیصل نے گانے کے ذمہ داروں کو گرفتار کرنے کے احکامات جاری کرتے ہوئے کہا کہ یہ گیت مقدس شہر کی رسم و رواج کو مجروح کرنے کے ساتھ ساتھ معزز آبادی کی شناخت اور روایات سے متصادم ہے۔
