اسلام آباد: کرونا وائرس کے باعث عمرہ زائرین کی سعودی عرب آمد پر پابندی سے متعلق سعودی سفیر نے اچھی خبر سناتے ہوئے کہا ہے کہ عمرہ زائرین کے ویزے میں توسیع کردی جائے گی۔
تفصیلات کے مطابق وزیرمذہبی امور نورالحق قادری اور سعودی سفیر کی ملاقات ہوئی جس میں عمرہ زائرین کو روکنے اور حج سےمتعلق دیگر معاملات پر تبادلہ خیال کیا گیا۔
اس موقع پر سعودی سفیر کا کہنا تھا کہ عمرہ زائرین کو عارضی طور پر روکا گیا ہے، عمرہ زائرین کے ویزوں میں توسیع کر دی جائےگی۔
سعودی سفیر نے کہا کہ 22 ممالک سے عمرہ زائرین کو روکا گیا ہے تاہم مناسب میکانزم تیار کرنے کے بعد عمرہ زائرین کو آنے دیا جائے گا۔
وفاقی وزیر مذہبی امور نورالحق قادری نے کہا کہ عمرہ زائرین اور حج کے والے سے حکومت سعودی حکام کیساتھ مسلسل رابطےمیں رہے گی۔
یہ بھی پڑھیں: سعودی عرب کی پابندی ، عمرہ زائرین کے لئے نیا حکمنامہ جاری
دوسری جانب ترجمان پی آئی اے کے مطابق عمرہ زائرین اور سیاحتی ویزہ والوں پر سعودی عرب آمد پر پابندی عائد کی گئی ہے۔
مذکورہ پابندی کے بعد پی آئی اے کال سینٹر سے معزز مسافروں کو اطلاع فراہم کی جارہی ہے۔ پی آئی اے نے مسافروں کو بکنگ تبدیلی، کرایہ میں فرق اور ٹکٹ واپسی کے چارجز ختم کر دئے ہیں۔
پی آئی اے دفاتر اور ائر پورٹ پر مسافروں کو ہر ممکن سہولیات اور معلومات فراہم کی جارہی ہیں۔ سفری پابندی کے باوجود ائر پورٹ پہنچنے والے مسافروں کو پی آئی اے کی جانب سے گھر واپس پہنچانے کے لئے ٹرانسپورٹ بھی فراہم کی جارہی ہے۔
مزید برآں پی آئی اے کی جدہ اور مدینہ منورہ کے لئے پروازیں معمول کے لئے آپریٹ کی جارہی ہیں تا کہ وہ عمرہ زائرین جو مذہبی رسومات کی ادائیگی کے لئے حجاز مقدس میں موجود ہیں ان کو وطن واپس پہنچایا جا سکے۔
