دبئی : متحدہ عرب امارات میں ملازمت پیشہ ماؤں کو ان کے اوقات کار میں بڑی چھُوٹ دے دی گئی اور کہا وہ صبح دفتر 2 گھنٹے دیر سے آ سکتی ہیں یا پھر مقررہ وقت سے دو گھنٹے پہلے دفتر سے واپس گھر جا سکتی ہیں۔
تفصیلات کے مطابق متحدہ عرب امارات میں فیڈرل انویسٹی گیشن فار گورنمنٹ ہیومن ریسورسز کی جانب سے ایک سرکلر جاری کیا گیا ہے ، جس میں ایسی ملازمت پیشہ خواتین کو دفتری اوقات میں رعایت دی گئی ہے، جو اپنے بچوں کو نرسری میں چھوڑ کر ملازمت کرنے آتی ہیں۔
سرکلر میں کہا گیا کہ یہ رعایت سرکاری محکموں اور اداروں میں کام کرنے والی خواتین کے لئے ہیں، ایسی ملازمت پیشہ خواتین صبح دفتر دو گھنٹے دیر سے آ سکتی ہیں یا پھر مقررہ وقت سے دو گھنٹے پہلے دفتر سے واپس گھر جا سکتی ہیں۔
فیڈرل انویسٹی گیشن فار گورنمنٹ ہیومن ریسورسز کی جانب سے یہ فیصلہ ملک بھر میں موجود نرسریوں کی عارضی بندش کے بعد کیا گیا ہے اور کہا گیا خواتین کو یہ رعایت اس وقت تک کیلئے دی گئی ہے جب تک بچوں کے لیے تمام نرسریاں دوبارہ کھول نہیں دی جاتیں۔
خیال رہے کرونا وائرس کے خطرے کے پیش نظر وزارت تعلیم نے مملکت میں موجود نرسریوں کو عارضی طور پر بچوں کے لیے بند کر دیا ہے، جس کی وجہ سے ملازمت پیشہ خواتین کو اپنی دفتری مصروفیات کے باعث بچوں کو گھروں پر دیکھ بھال میں خاصی مشکلات کا سامنا کرنا پڑ رہا ہے۔
