ریاض: سعودی عرب میں کروناوائرس سے صحت یاب مریضوں کی تعداد میں اضافہ ہورہا ہے، ایک دن میں وبائی مرض کے 5 ہزار سے زیادہ مریض صحت یاب ہوئے۔
عرب میڈیا کی رپورٹ کے مطابق گزشتہ 24 گھنٹوں کے دوران کرونا کے 2 ہزار کے قریب کیسز رپورٹ ہوئے لیکن اسی دوران وبا کے پانچ ہزار مریض صحت یاب ہوئے جسے خوش آئند قرار دیا جارہا ہے۔
رپورٹ کے مطابق سعودی عرب میں ایک دن میں 42 مریض ہلاک ہوئے جس کے بعد مملکت میں کرونا سے اموات کی مجموعی تعداد 2 ہزار 325 ہوچکی ہے جبکہ ملک میں مریضوں کی کل تعداد 2 لاکھ 40 ہزار 474 ہے۔
کروناوائرس: سعودی عرب سے حوصلہ افزا خبر آگئی
سعودی وزارت صحت کا کہنا ہے کہ مملکت میں کرونا وائرس میں مبتلا افراد میں صحتیابی کے تناسب میں بھی اضافہ ہو رہا ہے اور اب تک کرونا کو شکست دینے والوں کی تعداد ایک لاکھ 83 ہزار 48 ہوگئی ہے۔
سعودی حکومت نے عوام پر زور دیا ہے کہ وہ کرونا وائرس سے بچاو کے لیے سماجی فاصلے کے اصول پرعمل کرنا نہ چھوڑیں کیونکہ اس وائرس سے بچاو کے لیے یہ عمل انتہائی ضروری ہے۔
