بخارسٹ: رومانیہ کے میئر نے موت کے دو ہفتوں بعد بھاری اکثریت سے دوبارہ انتخابات میں کامیابی حاصل کر لی۔
غیر ملکی میڈیا کے مطابق جنوب مشرقی یورپی ملک رومانیہ کے ایک گاؤں کے میئر اپنی انتخابی مہم میں ایک بڑے دھچکے کے باوجود بھاری اکثریت کے ساتھ دوبارہ منتخب ہو گئے، وہ انتخابات سے تقریباً دو ہفتے قبل ہی فوت ہوگئے تھے۔
دیوسیلو کے سوشل ڈیموکریٹ میئر عیان علیمان اتوار کو منعقد ہونے والے انتخابات میں 64 فی صد ووٹ کے ساتھ تیسری مدت کے لیے دوبارہ منتخب ہوئے، وہ 17 ستمبر کو کرونا وائرس کے انفیکشن کے باعث پیدا ہونے والی پیچیدگیوں کی وجہ سے انتقال کر گئے تھے۔
آن لائن پوسٹ کی گئی ایک ویڈیو میں دکھایا گیا ہے کہ ووٹنگ ختم ہونے کے بعد علیمان کے درجنوں حامیوں نے علیمان کی قبر پر حاضر ہو کر موم بتیاں روشن کر کے شب بیداری کی۔
الیکشن حکام کا کہنا تھا کہ علیمان کا نام بیلٹ پر پہلے ہی چھاپا جا چکا تھا اور ووٹنگ شروع ہونے سے قبل اسے درست کرنے کے لیے بہت دیر ہو چکی تھی۔
انھوں نے کہا کہ اب اس شہر میں نئے میئر کا انتخاب کرنے کے لیے خصوصی انتخابات منعقد کیے جائیں گے، اس دوران علیمان کے نائب عبوری میئر کی حیثیت سے خدمات انجام دیں گے۔
واضح رہے کہ رومانیہ میں کرونا وائرس سے اب تک 4,748 افراد ہلاک ہو چکے ہیں جب کہ ایک لاکھ 24 ہزار کیسز سامنے آئے، جن میں سے 99 ہزار سے زائد مریض صحت یاب ہو چکے ہیں۔
