دبئی: متحدہ عرب امارات کے نائب صدر اور دبئی کے حکمران شیخ محمد بن راشد المکتوم نے کابینہ کی منظوری کے بعد نئی رہائشی پالیسی کی منظوری دے دی جس کے بعداب غیر ملکی طلبہ اپنے اہل خانہ کو امارات بلانے کے مجاز ہوں گے۔
خلیج ٹائمز کی رپورٹ کے مطابق متحدہ عرب امارات کی کابینہ کی جانب سے دی جانے والی منظوری کو متحدہ عرب امارات کے نائب صدر اور دبئی کے وزیر اعظم شیخ محمد بن راشد المکتوم نے بھی منظور کرلیا۔
دبئی کے وزیراعظم نے کابینہ کی منظوری کے وقت کہا کہ ’خطے میں اعلیٰ تعلیم کے فروغ کے لیے متحدہ عرب امارات میں 77 سے زیادہ جامعات ہیں جن میں ہزاروں غیر ملکی طالب علم تعلیم حاصل کررہے ہیں‘۔
اُن کا کہنا تھا کہ رہائشی پالیسی کی منظوری کے بعد اب غیر ملکی طالب علموں کو اپنے اہل خانہ کو ساتھ رکھنے کی اجازت ہوگی بشرطیکہ اُن کی آمدنی اتنی ہو کہ وہ خاندان کی کفالت کرسکیں۔
متحد عرب امارات کے نائب صدر نے اس کے ساتھ ہی نئی قرض پالیسی کی بھی منظوری دی جس سے مملکت میں مالی اور بینکاری کے شعبوں کو مدد فراہم کی جائے گی۔
علاوہ ازیں راشد المکتوم نے سیاحت کے مزید فروغ کے لیے امارات ٹورازم کونسل تشکیل دینے کا اعلان بھی کیا۔
